बजेट इनेत अन्यौल
येँ (नेपालभाषा टाइम्स)÷थ्वहे जेठ महिनाया मध्यपाखे बजेट बीगु लागिं सरकारं तयारी यानाच्वंसां थुगुसी बजेटया ध्यबा खर्च यायेगु मामिलाय् धाःसा तःधंगु हे अन्यौल ब्वलंगु दु । छखे जेठ १५ गते संघीय सरकारं बजेट बीत्यंगु दुसा थ्व बजेटय् थःपिनि जिल्लाया योजना दुथ्याके माल धकाः प्रधानमन्त्री लगायत सभामुख व मन्त्रीतय्सं तकं अर्थ मन्त्रालय व योजना आयोगय् पौ च्वयाः ध्यबा माग यानाच्वंगु दु ।
प्रधानमन्त्री केपी ओलीं प्रधानमन्त्रीया लेटर हेडय् हे पौ च्वयाः थःगु जिल्लाया लागिं बजेट माल धकाः माग याना छ्वःगु खःसा सभामुख कृष्ण बहादुर महरां नं थःगु जिल्लाया लागिं दर्जनौं योजनात च्वयाः योजना आयोगय् छ्वया बिउगु खः ।
तर संघीय सरकारं आः जिल्लाय् बजेट छ्वयेगु ज्या थःपिंसं यायेगु मखु, थ्व ज्या ला प्रदेश सरकारतय्सं याइ धायेवं अज्याःगु योजना माग याइपिं सांसदत आः हानं प्रदेश सरकारपाखे ब्वाँय् वनाच्वंगु दु ।
थ्वहे झ्वलय् ३ नम्बर प्रदेशया सरकारं बजेट हयेगु तयारी यानाच्वंगु इलय् अन थःगु क्षेत्रय् बजेट तया बी माल धकाः माग यासें नेता, कार्यकर्ता व स्थानीय तहया जनप्रतिनिधितय्गु समेत भीड जुयाच्वंगु दु । झिंस्वंगू जिल्ला दुगु प्रदेश ३ या थीथी राजनीतिक कार्यकर्तात थौंकन्हय् प्रदेशया थीथी मन्त्रालयय् ब्वाँय् जुयाच्वंगु लूगु दु ।
थःगु जिल्लायात बजेट माल धासें छगू हे जिल्लां २ खर्ब तका तक ध्यबा माग याना हःगु खँ नं सीदुगु दु । सिन्धुपाल्चोक जिल्लां २ खर्ब तका माग याना हःगु खँ मुख्यमन्त्री डोरमणि पौडेलं कनादीगु दु ।
प्रदेश सरकारं थःगु नीति तथा कार्यक्रम प्रदेश संसदय् पेश यायेगु तयारी यानाच्वंगु दुसा बजेट दयेकेगु ज्या नं न्ह्यानाच्वंगु इलय् मन्त्रालयया मन्त्रीत जिल्लां वःपिं स्थानीय सरकार प्रमुख व राजनीतिक कार्यकर्तायात नापलायेत व्यस्त जुयाच्वंगु दु ।
स्थानीय सरकारतय्सं केन्द्र सरकारयाके बजेट माग याःबलय् आः केन्द्रय् मखु प्रदेशय् हुँ धाःगुलिं स्थानीय सरकारया प्रतिनिधित नं प्रदेशय् ब्वाँय् वयाच्वंगु खँ धाःगु दु । आः प्रदेश व केन्द्रीय सरकारपाखें याइगु खर्च नं शर्त सहित स्थानीय सरकारय् हे वइगु जुयाच्वंगु दु ।
मेखे प्रतिनिधिसभा व प्रदेश सभाया सांसदतय्पाखें नं तप्यंक खर्च याये दइ कथंया बजेट वइगु जुयाच्वंगु दु । थगुने तक संघीय संसदया सांसदतय्त म्हतिं ४ करोड तका तक विकास खर्च बिउगु खःसा आः थ्व ध्यबा नं बढे यानाः १० करोड याना बी माल धकाः माग जुयाच्वंगु दु ।
सांसदतय्पाखें खर्च जुइगु थ्व बजेट नं चाःहिलाः स्थानीय निकायय् हे वइगु खःसां उकिया खर्च धाःसा सांसदं थःगु क्षेत्रय् मिले यानाः जक याये फइगु व्यवस्था दु ।
LEAVE YOUR COMMENTS