कलंकीया मालपोत नमूना ज्याकू

येँ – येँया कलंकीइ च्वंगु मालपोत कार्यालययात नमूना मालपोत कार्यालय घोषणा याःगु दु । म्हिगः बुधवाः छगू ज्याझ्वःया दथुइ प्रधानमन्त्री केपी ओलीं येँ मनपा १४ वडाय् लाःगु थुगु मालपोत कार्यालययात नमूना मालपोत कार्यालय घोषणा याःगु खः । नमूना मालपोत ज्याकुथिइ अपांगमैत्री जूगु लिसें ग्वाहालि कक्ष, सेवा केन्द्र, टोकन प्रणाली दुगु खँ धाःगु दु ।

अथेहे सेवाग्राहीं थःम्हं कायेमाःगु सेवाया बारे छेँय् हे च्वनाः जानकारी कायेफइगु खँ धाःगु दु ।घोषणा ज्याझ्वलय् न्ववासें प्रधानमन्त्री ओलीं सरकारं विकास व सेवाया ज्याय् प्रविधिया अधिकतम उपयोग यायेगु नीति ज्वनाच्वंगु खँ धयादिसें थुकिं देय्यात समृद्ध यायेत भूमिका म्हिती धयादिल ।

भूमि व्यवस्था मन्त्रालयया सचिव गोपीनाथ मैनालीं मालपाते ज्याकुथिइ सेवाग्राहीयात फुक्क सुविधा एकद्वार प्रणालीपाखें बीगु निंतिं नमूना कार्यालय संचालनय् हयागु खँ धयादिल ।अथेहे भूमि व्यवस्थापन तथा अभिलेख विभागया महानिर्देशक गोकर्णमणि भुर्तेलं अनलाइन सेवा प्रारम्भ जूगुलिं सेवाग्राही लाभान्वित जूगु व राजश्व संकलनय् खनेदुगु वृद्धिं यानाः चालु आवय् ४० अर्ब राजश्व संलकन जुइगु अनुमान यानादीगु दु ।