बेलायती प्रधानमन्त्रीइ न्याम्हेसिया दावेदारी

बेलायती प्रधानमन्त्री टेरिजा में राजीनामा बीगु जुइवं न्हूगु प्रधानमन्त्रीया निंतिं सत्तारुढ कन्जरभेटिभ पार्टीया न्याम्हेसिनं दावी याःगु दु । प्रधानमन्त्री में वइगु महिनाय् राजीनामा बीगु घोषणा यायेवं कन्जरभेटिभ पार्टीइ प्रतिस्पर्धा सुरु जूगु खः । स्वास्थ्य मन्त्री म्याट ह्यान्कक प्रधानमन्त्रीया निंतिं दावेदार याःम्ह दकलय् लिपांम्ह नेता जूगु दु ।

थ्वयां न्ह्यव विदेशमन्त्री जेरमी हन्ट, अन्तर्राष्ट्रिय विकास मन्त्री रोरी स्टेवार्ट, पुलांम्ह विदेशमन्त्री बोरिस जनसन व पुलांम्ह रोजगार तथा पेन्सनमन्त्री एस्टर मक्भें सत्तारुढ पार्टीया नेता जुइगु निंतिं दावी यायेधुंकूगु दु ।युरोपेली संघपाखें बेलायतयात छुटे यायेगु ब्रेक्जिटया निंतिं प्रधानमन्त्री में हःगु प्रस्ताव तःक्वः हे संसदय् असफल जुइवं में राजीनामा बीगु खँ धाःगु दु ।

न्हूम्ह प्रधानमन्त्रीया दावेदार स्वास्थ्यमन्त्री ह्यान्ककं ब्रेक्जिट लागू याये तसकं आवश्यक धासें थःम्हं टेरिजा मेया उत्तराधिकारी जुइम्हेसिनं संसदं थ्व सम्बन्धी आवश्यक सम्झौताया निंतिं ‘क्रूर इमान्दारिता’ क्यनेमाःगु खँ धयादीगु दु । टेरिजा में शुक्रवाः वइगु जून ७ तारिखय् राजीनामा बीगु घोषणा यानादीगु खः ।

वय्कलं पार्टीया न्हूम्ह नेता मल्यःतले थम्हं प्रधानमन्त्रीया पदय् च्वनाः ज्या यायेगु खँ नं धयादीगु खः । प्रधानमन्त्री में ‘टोरी ब्याकबेञ्च १९२२ कमिटी’ धाइगु सत्तारुढ कन्जरभेटिभ पार्टीया सांसदतय् पुचःया अध्यक्ष सर ग्राहम ब्य्राडीलिसे थःम्हं राजीनामा बिउगु छवाः दुने न्हूम्ह नेता ल्ययेगु प्रक्रिया न्ह्याकेमाःगु सहमति यानादीधुंकूगु दु । अथेहे प्रधानमन्त्री में थः उत्तराधिकारीं नं ब्रक्जिट सम्बन्धी जनमत संग्रहया लिच्वःयात सम्मान यासें न्ह्याःवनेमाःगु खँ धयादीगु दु ।

सम्बन्धित बुखँ

LEAVE YOUR COMMENTS