
एजेन्सी – बेलायतय् खनेदुगु कोरोनाया न्हूगु ताजिया भाइरस आः फ्रान्सय् नं खनेदुगु दु । फ्रान्सया स्वास्थ्य मन्त्रालयया कथं वंगु वालय् लन्दनं लिहां वःम्ह फ्रेन्च मिजंयाके थ्व भाइरस खनेदुगु खः । उम्ह ल्याय्म्हयात आः टूर्सय् च्वंगु वयागु छेँय् हे आइशोलेसनय् तयातःगु दु । भाइरस खनेदुम्ह संक्रमितयात आः वयागु हे छेँय् तयाः वासः याकाच्वंगु दु ।
फ्रान्सं बुधवाः जक बेलायतलिसे आवतजावतय् तयातःगु प्रतिबन्ध चिइकूगु खः । तर बेलायतं वःपिंत थःपिंक कोरोना भाइरस संक्रमण मजूगु प्रमाणपत्र क्यनेमाःगु धाःसा अनिवार्य यानातःगु दु । थ्व न्हूगु ताजिया भाइरस डेनमार्क, अस्ट्रेलिया व नेदरल्यान्डसय् नं खनेदयेधुंकूगु दु । बेलायतं वःपिंके न्हूगु भाइरस खनेदयेवं यक्व हे देशं बेलायतं वइपिंत प्रतिबन्ध तयेगु व उडान रद्द यायेगु याःगु खः ।
थ्व भाइरस वंगु सेप्टेम्बरय् बेलायतय् दकलय् न्हापां खनेदुगु खः । थ्व न्हूगु भाइरस तसकं तीव्रगतिं कोरोनाया पुलांगु भाइरसयात विस्थापित याना यंकाच्वंगु, थुकी जूगु उत्परिवर्तनं भाइरसय् दये माःगु महत्वपूर्ण ब्वयात हिला बिउगु दु, अथेहे प्रयोगशालाय् यानाच्वंगु परीक्षणं थथे खनेदुगु उत्परिवर्तनं मनूया म्हय् च्वंगु कोषय् थुकिं झन् अःपुक संक्रमण यानाबिइगु खनेदुगु खः । अथे जूगु थ्व न्हूगु भाइरसयात कयाः विश्वं चिउताः कयाः स्वयाच्वंगु दु । तर थ्व न्हूगु भाइरस तसकं घातक जूगु छुं प्रमाण धाःसा मलूनि धाःगु दु ।
LEAVE YOUR COMMENTS