विश्वप्रसिद्ध वैज्ञानिक स्टिफन हकिंग मन्त

एजेन्सी– विश्वप्रसिद्ध वैज्ञानिक स्टिफन हकिंग थौं मन्त । वय्कः ७६ दँ उमेरय् मदुगु खः । हकिंग छगू थज्याःगु ल्वचं पीडित खः, गुकिं यानाः वय्कःयागु म्हया अप्वःथें ब्व पारालाइसिस जुयाच्वंगु खः । अथे खःसां वय्कलं हारे मचासे विज्ञानया ख्यलय् थीथी खोज यानादीगु खः ।

हकिंगं सापेक्षता (रिलेटिविटी), ब्लाय्क होल व बिग ब्यांग थ्योरीयात थुइकेगु निंतिं महत्वपूर्ण भूमिका म्हितूगु खः । सन् १९४२ जनवरी ८ य् इंग्ल्यान्डया अक्सफोर्डय् बूम्ह हकिंगयात युनिभर्सिटीइ ब्वना च्वंगु इलय् हे मोटर न्यूरोन धाःगु गम्भीर ल्वचं पीडित जुयाच्वंगु सीकूगु खः । सन् १९६३ इ थुगु ल्वय् जुयाच्वंगु लुइकूबलय् मुक्कं निदँ जक म्वाइगु खँ चिकित्सकतय्सं धाःगु खः ।

वय्कलं सन् १९८८ य् ‘ए ब्रीफ हिस्टरी अफ टाइम’ सफू च्वयादीगु खः । थ्व सफू संसारया बेस्ट सेलर सफू मध्ये छगू लाखः । थ्व सफू छगू करोडं मल्याक चूगु खः । वय्कलं थ्व बाहेक तःगू हे विज्ञान सम्बन्धी महत्वपूर्ण सफू च्वयादीगु दु ।

वया स्वम्ह मस्त लुसी, रोबर्ट व टिमं वैज्ञानिक हकिंग मदुगु जानकारी बिसें वय्कः छम्ह अतुलनीय वैज्ञानिक व असाधारण मनू जूगु खँ धाःगु दु । हकिंग थःगु हे छेँय् मदुगु खः । वय्कः छु जुया मदुगु खः धयागु बारे धाःसा वया छेँजःपिंसं जानकारी बिउगु मदुनि ।

न्ह्याब्लें ह्विलचियर च्वनाच्वनेमाःम्ह हकिंग्स सामान्य मनू स्वयां बिस्कं खनेदु । वय्कलं थःगु शारीरिक अक्षमताया छखे तयाः यदि इच्छाशक्ति दुसा मनुखं न्ह्यागुं यायेफु धयागु सावित यानाक्यंगु दु ।

वय्कलं थःगु ज्यायात कयाः धयादीगु खः, ‘जिगु थ्व खँय् लसता दु कि ब्रम्हाण्डयात थुइकेगु निंतिं जिं नं भूमिका म्हिता । थुकिया रहस्य थुइकेगु व ब्रम्हाण्डयात कयाः जूगु शोधय् योगदान बीखन । मनूतय् भीडय् जिगु ज्यायात लुमंकूगु खँय् जितः गर्व दु ।’