नोबेल शान्ति पुरस्कार विजेता मलालां इहिपा यात

एजेन्सी- नोबेल शान्ति पुरस्कार विजेता मलाला युसुफजइं इहिपा याःगु दु । मलालां मंगलवाः बेलायतया बर्मिङ्घम सहरय् इस्लामिक परम्पराकथं इहिपा याःगु खः । २४ दँ दुम्ह मलालां असर मलिकलिसे इहिपा याःगु खः । सामाजिक सञ्जाल मार्फत मलालां थःगु इहिपाया जानकारी बिसें इहिपा जूगु न्हि जीवनया हे मूल्यवान न्हि धाःगु दु ।

पाकिस्तानया मलाला युसुफजइयात मिसा अधिकार व शिक्षाया निंतिं ल्वानाच्वंगु इलय् सन् २०१२ य् तालिबानतय्सं छ्यनय् गोलीं कयेकाबिउगु खः । मलालायात वासः यायेत बेलायतय् यंकूगु खः । सन् २०१४ य् मलालायात नोबेल शान्ति पुरस्कार बिउगु खः । नोबेल पुरस्कार त्याकूम्ह मलाला आतकया हे दकलय् क्वकालिम्ह खः । मानव अधिकारकर्मी मलालां अक्सफोर्ड विश्वविद्यालयय् राजनीति शास्त्र व अर्थशास्त्र ब्वंगु खः ।

मलालाया भाःत नं पाकिस्तानी खः । मलालाया भाःत असर मलिक पाकिस्तान क्रिकेट बोर्ड अन्तर्गत नेसनल हाइ परफर्मेन्स सेन्टरय् महाप्रबन्धक खः ।