श्रीकृष्णया कृपां ५ दर्जन गोपिनी !

सामाजिक रीतिरिवाजकथं छम्ह स्वयां अप्वः इहिपा यायेगु गैर कानुनी खः । उकिं सुं नं मिजं नं छम्ह स्वयां अप्वः मिसा इहिपा यानाः तल धाःसा वयात बहुविवाहया द्वपनय् सजाय जुइ । थज्याःगु कानुन नेपालय् जक मखु भारतय् नं दु । अथे खःसां यक्वसिनं समाजं जक मखु, सुनानं मसीक छम्ह स्वयां अप्वः कलाः तयातःपिं नं दु ।

भारतया हे जम्ह सामाजिक रुपं प्रतिष्ठित मनुखं निम्ह, प्यम्ह वा च्याम्ह झिम्ह मखु झण्डै न्यागू दर्जन मिसालिसें इहिपा याःगु दु । न्याक्वः तक सांसद अले मन्त्री तकं जुइ धुंकूम्ह बागुन सुम्ब्रुइ नांया मनुखं जीवनय् ५८ म्ह मिसालिसें इहिपा याःगु खः । खय्तला भारतय् सांसद व मन्त्री नापं पहुँचवालातय्सं कानुन हाचां गाइगु सामान्य खँ खः ।

तर सुम्ब्रइं मेपिं सुं नं सांसद वा मन्त्रीतय्सं याये मफुगु ज्या याना बिउगु दु ।थःगु जीवनकालय् ५८ म्ह मिसायात कलाः दयेकूम्ह सुम्ब्रुइयात जीवनया अन्तिम इलय् वयाः वयात गुलिखे थः कलाःया नां तकं लुमं मजू । भारतया झारखण्ड राज्यया न्हापांगु विधानसभाया उपाध्यक्ष तकं जूम्ह सुम्ब्रुइ ९६ दँया उमेरय् वंगु जुन २२ कुन्हु मदुगु खः ।

तसकं सादा जीवन व्यतीत याइम्ह सुम्ब्रुइया विशेषता धइगु हे चिकुला जुइमा वा ताल्ला जुइमाः वयागु म्हय् वसःया नामय् धोती हे जक दयाच्वनी ।थःगु जीवनय् करिब न्यागू दर्जन मिसानापं इहिपा याःम्ह सुम्ब्रुइं थुकियात कयाः न्ह्याबले धयाच्वनीगु खः कि ‘भगवान श्रीकृष्णया प्रेरणां थम्हं नं न्यागू दर्जन गोपिनी हयागु खः ।’