इतिहासय् खराब बहस ज्याझ्वः
एजेन्सी – अमेरिकाय् वइगु नोभेम्बर महिनाय् राष्ट्रपतिया निर्वाचन जू वनाच्वंगु दु। थ्व अवस्थाय् राष्ट्रपति पदया निम्ह उम्मेदवारयात कयाः छगू टेलिभिजन बहस ज्याझ्वः जुल ।
अमेरिकी राष्ट्रपति पदया निम्ह उम्मेदवार वर्तमान राष्ट्रपति रिपब्लिकनया डोनाल्ड ट्रम्प व मेम्ह राष्ट्रपतिया दावेदार डेमोक्र्याटिकया जो वाइडेन दथुइ टेलिभिजन बहस जूगु खः । राष्ट्रपतिया निम्ह प्रत्याशी दथुइ जूगु थुगु टेलिभिजन बहसयात इतिहासया हे ‘खराब बहस’या संज्ञा बिउगु दु। निम्ह उम्मेदवारया दथुइ जुयाच्वंगु टेलिभिजन बहसय् ट्रम्पं वाइडेनयात नवाके हे मबिसे हस्तक्षेपया रणनीतिइ कुहां वयेवं बहस संचालन यानाच्वंम्ह प्रस्तोतां ट्रम्पयात तकं हक्के माःगु स्थिति ब्वलंगु खः । बहसया इलय् थः प्रतिस्पर्धीप्रति सामान्य शिष्टाचारतकं मक्यनेवं बहसया हे दथुइ ‘सट अप’ धकाः सुम्क च्वनेत धायेमाःगु अवस्था ब्वलंगु खः ।
थुगु बहस ज्याझ्वःपाखें खास मुद्दाय् बहस जुइगु व उम्मेदवारतय्सं नं थःथःगु धारणा व भावी ज्याझ्वः सार्वजनिक याःगु आशा याःगु खः । तर थुकथंया बहसं स्वकुमिलिसें मतदातातय्त तकं निराश यायेगु ज्या जूगु समाचार संस्थातय्सं टिप्पणी याःगु दु। विषयवस्तुइ दुहां वनेगु स्वयां नं विपक्षी उम्मेदवारया लिसः मन्यनेगु, न्यंसां धैर्य मयायेगु व छम्हं मेम्हेसिया दथुइ ततसलं हालाः ब्वःबीगु शैलीइ तकं कुहां वःगु खः ।
‘फक्स न्युज च्यानल’या क्रिस वासलं संचालन याःगु बहस ज्याझ्वलय् न्हापांखुसी ट्रम्प व वाइडेन चुलिंचू जूगु खः । बहसय् मुख्य यानाः महामारी, रंगभेद, जलवायु परिवर्तन, अर्थतन्त्र, चुनावी स्वतन्त्रता लगायाया विषयत दुथ्याकातःगु खः । संचारमाध्यमतय्सं थुकियात बहस मखसे निम्हेसिया ल्वापुया नं संज्ञा बिउगु दु ।
LEAVE YOUR COMMENTS