लाया पोस्टरय् साया किपा छापे जुइवं बबाल

येँ – पशु सेवा विभागं मोहनि नखःयात लक्षित यासें सार्वजनिक याःगु पोस्टर विवादय् लाःगु दु । ‘वधशालादेखि भान्सासम्म स्वच्छ र स्वस्थ मासु’ धइगु सरकारया लोगो तयाः प्रचार याःगु सामग्रीइ राष्ट्रिय जनावर सायागु तकं तस्वीर छापे याना तःगु खनेवं विवाद पिहां वःगु खः ।
लाया परिकारया रुपय् खसी, बंगुर, फै, न्या लिसें सायागु तकं तस्वीर तयातःगु खः ।

लिसें पोस्टरय् दुरु त्वनाच्वंम्ह मचाम्ह च्वलेचिया किपा नं दु । पोस्टरकयात कयाः विवाद पिहां वयेवं विभागया प्रवक्ता डा. चन्द्र ढकालं जनचेतनाया निंतिं पोस्टर डिजाइन यानागु खँ धासें गलत नियतं थ्व ज्या यानागु मखु धकाः स्पष्टीकरण बियादीगु दु । पोस्टरया विषयय् म्हिगः च्वंगु बैठकय् सहलह जूगु दु ।

सहलह लिपा पोष्टरं साया किपा चीकेगु निर्णय याःगु दु । विभागं आः बजारय् छ्वयेधुंकूगु पोस्टर लित कायेगु प्रक्रिया न्ह्याकूगु खँ धाःगु दु ।
कृषि तथा पशुपंक्षी विकास मन्त्रालय अन्तर्गतया पशुसेवा विभागं सर्वसाधारण जनतायात स्वच्छ व स्वस्थ ला नयेत सचेत याकेगु निंतिं पोस्टर तयार याःगु खः । तर उकी द्वगुलिं क्षमायाचना सहित भिंकेगु ज्या जूगु खँ धाःगु दु ।

मेखे राष्ट्रिय प्रजातन्त्र पार्टी धाःसा उगु पोस्टरयात कयाः विरोध प्वंकूगु दु । राप्रपां छगू प्रेस विज्ञप्ति पिथनाः ‘मोहनि लक्षित प्रचार सामग्रीइ हिन्दूतय् आस्था लिसे राष्ट्रिय जनावर साया तस्वीर दुथ्याइगु दुःखद व दुर्भाग्यपूर्ण खः धासें धार्मिक आस्था थेंज्याःगु संवेदनशील विषयसं अक्षम्य त्रुटि जुइगु सामान्य विषय जुइ फइ मखु ।’

थ्व ज्या नियतवश वा भुलवश छु जूगु खः धइगु बारे छानविन यानाः दोषीयात कडा कारबाही यायेत नं राप्रपां माग याःगु दु । थ्वहे झ्वलय् पशु सेवा विभागं त्रुटि स्वीकार यासें क्षमा याचना सहित पोस्टर भिंकेगु ज्या जुइधुंकुगु व सम्बन्धित निकाययात पत्रचार तकं याये धुनागु खँ धाःगु दु ।

विभागया महानिर्देशक डा. वंशी शर्मां पोस्टर छपाईया त्रुटिया कारणं साया तस्वीर लाःगु स्वीकार यासें सरोकारवालाया गुनासोयात चिउताः तयाः भिंकेगु ज्या जुइधुंकूगु खँ धाःगु दु । विभागया महानिर्देशक शर्मां म्हिगः छगू विज्ञप्ति जारी यासें पोस्टर तत्काल भिंकेगु ज्या जूगु जानकारी नं बिउगु दु ।

सम्बन्धित बुखँ

LEAVE YOUR COMMENTS