देय् भ्वय् छेँया झिंच्याक्वःगु साधारणसभा

येँ – येँ महानगरपालिका वडा नं. २० स्थित भिंद्यः त्वालय् च्वंगु देय् भ्वय् छेँया झिंच्याक्वःगु साधारणसभा वंगु शनिवाः जुल । भ्वय् छेँ ग्वसाः खलःया नायः महेन्द्रध्वज जोशीया सभापतित्वय् जूगु साधारणसभां न्हूगु ज्यासना पुचः नं ल्यःगु खः ।

साधारणसभाय् अध्यक्ष महेन्द्रध्वज जोशीं थःपिनिगु कार्यकालय् जूगु थीथी ज्याखंया जानकारी बियादिसें आर्थिक प्रतिवेदन नं न्ह्यब्वयादीगु खःसा सचिव देवेन्द्रमान राजभण्डारीं प्रगति प्रतिवेदन न्ह्यब्वयादीगु खः ।

देय् भ्वय् छेँ २५ दँ क्यंगु लसताय् पिदंगु लुमन्ति पौ (स्मारिका) पुलांम्ह उपाध्यक्ष भरतमान राजभण्डारीं पितब्वज्या यानादीगु खःसा सम्पादक विजयकृष्ण श्रेष्ठं लुमन्ति पौयात कयाः थःगु नुगःखँ प्वंकादीगु खः ।

साधारणसभां देय् भ्वय् छेँया न्हूगु ज्यासना पुचः नं ल्यःगु खः । ज्यासना पुचलय् पुष्परत्न डंगोल अध्यक्ष, भक्त डंगोल उपाध्यक्ष, रजिन स्थापित सचिव, सुरेन्द्र रंजित कोषाध्यक्ष, देवकुमार महर्जन सहसचिव व सानुराजा रंजित सहकोषाध्यक्षय् च्वनादीगु दुसा दुजलय् श्यामकृष्ण मल्ल, घनश्याम श्रेष्ठ, लिलावती महर्जन, शोभा डंगोल व विरेन्द्रकाजी श्रेष्ठ च्वनादीगु दु ।