हानं दना वल संविधान संशोधन

संविधान संशोधन यायेत वाम गठबन्धन तयार दुगु सन्देश
येँ – राष्ट्रिय सभाया चुनाव सिधयेवं हे केन्द्रीय सरकार गठनया तयारी यानाच्वंपिं वाम गठबन्धनया शीर्ष नेतातय्सं लिपांगु इलय् वयाः संविधान संशोधन यायेत थःपिं तयार दुगु सन्देश मधेसवादी दलतय्त बीगु सुरु याना हःगु दु । गठबन्धनया शीर्ष नेतात केपी ओली व पुष्पकमल दाहालं म्हीग अलग अलग थासय् जूगु ज्याझ्वलय् सम्बोधन यासें संविधान संशोधन यायेत थःपिं तयार दुगु खँ धयादीगु खःसा म्हिगः हानं एमालेया महासचिव ईश्वर पोखरेलं नं वहे खँ लिसा कयादीगु खः ।

संविधान संशोधन यायेगु खँय् न्ह्याबलें विरोध याना वयाच्वंम्ह ओलीं म्हीग पोखराय् जूगु छगू ज्याझ्वलय् न्ववासें थः संविधान संशोधन यायेत तयार दुगु व मधेशी दलतलिसे वार्ता यायेत तयार दुगु खँ धयादीगु खः । थः संविधान संशोधनया खँय् थः गबलें विपक्षय् मदु धासें वय्कलं पहाडयात अलग तयाः तराईयात जक छगू प्रदेश दयेकेगु खँय् थः विरोधी खः धयादिल । वय्कलं वाम गठबन्धनलिसे तराई मधेसया पार्टीत नं समाहित जू वल धाःसा सदनय् दुई तिहाइ बहुमत खाइगु व संविधान संशोधन यायेत अःपुइगु बिचाः नं तयादीगु खः ।

मेखे एमालेलिसे पार्टी एकता यायेगु लँय् वनाच्वंगु माओवादी केन्द्रया अध्यक्ष पुष्पकमल दाहालं नं संविधान संशोधन याये फइगु खँ धयादीगु खः । शुक्रवाः जूगु पार्टी प्रवेश ज्याझ्वलय् न्ववासें वय्कलं मधेसी, आदिवासी जनजाति लगायतया अधिकार व सम्मान संविधानय् पूवंक सुरक्षित मजूनि धासें संविधान संशोधनया प्रक्रियापाखें ल्यं दुगु अधिकार चूलाके फइगु खँ कनादीगु खः । अथे हे म्हिगः अखिल नेपाल महिला संघया छगू ज्याझ्वलय् झाःम्ह एमाले महासचिव इश्वर पोखरेलं नं संविधान संशोधन यायेत थःपिं तयार दुगु खँ धयादीगु खः ।

मुद्दाया आधारय् संविधान संशोधनया निंतिं वाम गठबन्धन तयार दु व सहमति जुल धाःसा मधेशी दलयात केन्द्रीय सरकारय् दुथ्याकेत छुं नं कथंया समस्या मदुगु बिचाः वय्कलं तयादीगु खः । २ नम्बर प्रदेशय् मधेशी दलया नेतृत्वय् सरकार दयेकेत थःगु पार्टीं समर्थन याये फइगु खँ नं वय्कलं धयादीगु खः । वय्कलं न्ह्यःने धयादी, ‘जिमित गुगु कथं मधेशी विरोधी धकाः म्हसीकेगु यानाच्वंगु दु, व गलत खः, जिपिं जायज मागय् संशोधन व सहकार्यया निंतिं तयार दु ।’

औचित्यं पुष्टि यात धाःसा शक्ति सन्तुलनया आधारय् संविधान संशोधन न्ह्याबलें खुल्ला दुगु खँ वय्कलं धयादीगु खः । वाम गठबन्धनया थुपिं शीर्ष नेतातय्सं आकाझाकां हाकनं संविधान संशोधनय् नुगः क्वसायेका हःगुयात धाःसा मधेसी दलतय्त ह्ययेकेगु कुतः याःगु कथं टिप्पणी जुयाच्वंगु दु ।