ने. सं. ११४६ बछलाथ्व पञ्चमी - दयावीरसिं बुदिं

गुथि विधेयकय् जनप्रतिनिधितय् पहल

येँ – सरकारं हानं हयेत्यंगु विवादास्पद गुथि विधेयकय् नेवाःतय् चाहना कथं सशोधन याकेगु लागिं थःपिंसं पहल यायेगु खँ सत्तारुढ दल नेपाल कम्युनिष्ट पार्टीया नेवाः सांसदतय्सं कनादीगु दु । गुथि विधेयक विरुद्ध एकीकृत आन्दोलनपाखें नकतिनि येँ व यलया नेवाः जनप्रतिनिधिपिंलिसे थुकियात कयाः बिचाः कालबिल याःगु खः । सरकारं थ्वहे वइगु हिउँदे अधिवेशनय् थ्व विधेयक हइगु सम्भावना दु ।

प्रतिनिधिसभाया सांसद कृष्ण–गोपाल श्रेष्ठं यदि गुथिया बारे नेवाःतय् अवधारणा थ्वहे खः धइगु खँ आः हे पिहां वल धाःसा उकियात आः हे पेश यानाः संशोधनया कुतः याये, अथे मजुसें संसदय् विधेयक पेश यायेधुंकाः जक सुझाव वल धाःसा उकियात संशोधन प्रस्ताव दर्ता यानाः जूसां भिंकेगु कुतः याये धयादिल ।
अथे हे मेम्ह सांसद जीवनराम श्रेष्ठं गुथि सम्बन्धी छगू हे ऐनय् स्वनिगःया हकय् थज्याःगु व्यवस्था जुइ धकाः बिस्कं थाय् तःसा बांलाइगु सुझाव बियादिल ।
प्रदेश ३ या सांसद डा. अजयक्रान्ति शाक्यं सरकारं आः हःगु विधेयकया छु धारा झीत मजिउ, छाय् मजिउ अले उकिया पलेसा छु तःसा जी धकाः स्पष्ट हे तीन महल थें दयेकाः सरकारयात पेश याःसा खँ ल्हायेत अःपुइगु बिचाः तयादिल ।

येँ मनपाया मेयर विद्यासुन्दर शाक्यं गुथि विधेयक विरुद्ध आन्दोलन याःगु पुचःपाखें हे थःपिनि स्पष्ट धापू च्वयाः न्ह्यःने तयेमाःगु बिचाः तयादिल ।
ज्याझ्वलय् प्रदेश सभाया सांसदपिं बसन्त मानन्धर, राजेश शाक्य व राजकाजी महर्जनं राज्यलिसे निरन्तर वार्ता यानाः न्ह्याः वनेमाःगु बिचाः तयादिल ।
एकीकृत आन्दोलनया नायः डा. महेशमान श्रेष्ठ व लिउ नायः पवित्र वज्राचार्यं नेवाःतय् गुथि बारे सरकारयात सही सुचं थ्यंकाः थ्व समस्या ज्यंकेगु ज्याय् नेवाः जनप्रतिनिधिपिनि तःधंगु भूमिका दइगु खँ कनादिल ।

‘स्वनिगःयात बिस्कं व्यवस्था’
सरकारं हयेत्यंगु गुथि सम्बन्धी विधेयकय् न्ह्यागु हे व्यवस्था याना तःसां स्वनिगःया गुथिया हकय् बिस्कं व्यवस्था जुइमाःगु माग नेवाः समुदायं याःगु दु । स्वनिगःया गुथि व मेमेथाय्या गुथि पाःगु जुयाः थनया हकय् बिस्कं व्यवस्था जुइ धकाः कानूनय् हे उल्लेख यायेमाःगु बिचाः नं नेवाः आन्दोलनकारीतय्सं तःगु दु । नेवाः समुदायपाखें वःगु थ्वहे मागयात आः वइगु विधेयकय् दुथ्याकेगु लागिं थःपिंसं पहल यायेगु खँ नं नेवाः जनप्रतिनिधिपिंसं कनादीगु दु ।