ने. सं. ११४४ कौलाथ्व चौथी -

श्रीदेवी सीबलय् बोनी कपूर क्वथाय् हे दुगु

दुबईया खलिज टाइम्स पत्रिकाया कथं श्रीदेवी सीगु इलय् वया भाःत बोनी कपुर क्वथाय् हे दुगु खः । खलिज टाइम्सं दुबइस्थित भारतीय दूतावासयात उद्ढृत यासें च्वःगु दु– बोनी कपुर न्ह्यव हे भारत लिहां वयेगु निंतिं वनेधुंकूगु खः । तर कलाःयात सरप्राइज बीधकाः शनिवाः सनिलय् हाकनं होटलय् लिहां वल । सनिलय् ५ः३० बजे पाखे द्यनाच्वंम्ह श्रीदेवीयात थन, अले १५ मिनेट तक निम्ह दथुइ खँल्हाबल्हा जुल ।

खँल्हाबल्हाया झ्वलय् बोनीं डिनरया निंतिं न्यन । अले श्रीदेवी तयार जुइत वाशरुम वन । ताःई तक नं श्रीदेवी पिहां मवःगुलिं बोनीं खापा ध्याध्या यात । तर खापा मचायेकूगुलिं बोनीं धक्का बियाः खापा चायेकल । उबलय् श्रीदेवी बाथटबय् बेहास जुया च्वनेधुंकूगु जुयाच्वन । बोनीं वयात होशय् हयेत स्वल, तर होसय् मवयेवं पासायात फोन यात । अले बहनी ९ बजेपाखे थुकिया जानकारी प्रहरीयात बिउगु खः ।

थ्व लिपा प्रहरी व चिकित्सक टिम होटलय् थ्यन । उबलय् तक श्रीदेवी मदयेधुंकूगु जुयाच्वन । थ्व लिपा श्रीदेवीया सीम्ह पोस्टमार्टमया निंतिं अस्पताल यंकूगु खः ।
श्रीदेवीया पोस्टमार्टम लिपा दुबई प्रहरीं थुकिया प्रतिवेदन दुबईया सरकारी अभियोजन विभागयात लःल्हायेधुंकूगु दु । सरकारी अभियोजन विभागं आः थुकिया बारे थप छानविन यानाच्वंगु दु । विभागं आवश्यक जुल धाःसा हाकनं छक्वः पोस्टमार्टम याकेफु धाःगु दु । अथेहे विभागं श्रीदेवीया भाःत बोनी कपुरयात नं थःपिनिगु स्वीकृति बिना दुबई मत्वःतेत नं आदेश बिउगु दु ।

श्रीदेवीया सीम्ह भारत लितहयेत नं ई काइगु जूगु दु । दुबई स्थित भारतीय दूतावासं श्रीदेवीया सीम्ह गुबलय् भारत लित यंकेगु धयागु खँ तुरुन्त धायेफइमखु धाःगु दु । दुबईया सरकारपाखें छानविन यानाच्वंगु दु, उमिगु प्रक्रिया क्वचायेधुंकाः जक सीम्ह छ्वयाहइगु खँ दूतावासं धाःगु दु ।