नेपाल बैंक व शिवम सिमेन्टय् लगानीकर्तातय् आकर्षण

येँ – थुगु वाःया सुरु निसें कुहां वनाच्वंगु शेयरबजाः म्हिगः सोमवाः नं कुहां वंगु दु । नेपाल स्टकया कथं सोमवाः नेप्से परिसुचक ९.१३ अंकं कुहां वनाः १३०७.७१ अंकय् थ्यंगु दु । अथेहे तःधंगु कम्पनीतय् कारोवार मापन याइगु सेन्सेटिभ इन्डेक्स नं ०.९९ अंकं कुहां वनाः २७९.८० अंकं कुहां वंगु खः ।

सोमवाः नेप्से परिसुचक कुहां वंसां कारोवार रकम धाःसा थहां हे वंगु दु । सोमवाः जक छगू अर्ब २२ करोड तकां मल्याक शेयर कारोवार जूगु खः । शेयर बजारय् आः याःगु लगानीं प्यला न्याला लिपा हे लबः दइगु अनुमान कथं लगानीकर्तातय्सं लगानी अप्वयेका यंकाच्वंगुलिं कारोवार दां धाःसा अप्वया वंगु खँ शेयर विश्लेषकतय्सं धाःगु दु ।

लगानीकर्तातय् माग कथं बजेट वल धाःसा शेयर बजारय् अझ उत्साह खनेदइ

लगानीकर्तातय्सं वइगु आर्थिक दँया बजेटपाखें छुं आशा यानाच्वंगुलिं नं कारोवार अप्वयाच्वंगु खः । न्हापा पियाच्वंपिंसं नं आः बजेट वयेत्ययेका लगानी अप्वयेका हःगुलिं कारोवार दां अप्वःगु खँ धाःगु दु । लगानीकर्तातय् माग कथं बजेट वल धाःसा शेयर बजारय् अझ उत्साह खनेदइ, तर माग संवोधन मजुल धाःसा हाकनं बजाः कुहां वनेफुगु खँ विश्लेषकतय्सं धाःगु दु ।

संघीय बजेट वयेत आः न्हय्न्हु जक ल्यं दनि । शेयर कारोवार दां अप्वःसां लगानीकर्तात धाःसा सुरक्षित धयातःगु छुं कम्पनीइ हे जक झुमे जुयाच्वंगु दु । म्हिगः नं नेपाल बैंक व शिवम सिमेन्टय् हे लगानीकर्तातय् आकर्षण खनेदुगु खः ।

सोमवाः जूगु मुक्कं कारोवारय् नेपाल बैंक व शिवम सिमेन्टया जक थ्यंमथ्यं ४० प्रतिशत ब्व लाःगु दु । थकुन्हु शिवमया २५ करोड २१ लाख तकाया व नेपाल बैंकया २३ करोड २१ लाख तकाया कारोवार जूगु खः । लगानीकर्तातय् थुकथं सुरक्षित धयातःगु छुं सीमित कम्पनीइ जक झुमे जुयाच्वंगु समग्र बजारय् धाःसा लिच्वः लानाच्वंगु खँ धाःगु दु ।