साल्ट टे«डिङया खाद्य उद्योग फाइदाय्

येँ – साल्ट ट्रेडिङ कर्पोरेशन लिमिटेडया स्वामित्वय् दुगु खाद्य उद्योग लिमिटेडं वंगु आर्थिक दँ २०७३÷०७४ य् ६२ लाख तका खुद नाफा कमे यायेत ताःलाःगु दु ।अनावश्यक कर्मचारी कटौती, लागत खर्च म्हो यायेगु ज्या जूगुलिं यानाः उद्योग नाफाय् वंगु खँ धाःगु दु । वंगु दँय् कम्पनींं ३० करोड तकाया खाद्यन्नया कारोबार याःगु खः । कम्पनीया महाप्रबन्धक मुकुन्दप्रसाद जोशीं २०६३ सालय् छुं ई बन्द जुयाः सञ्चालनय् वःगु कम्पनीं आः तक घाटा मवंंनिगु खँ कनादीगु दु । आपालं सरकारी लगानी दुगु कम्पनी घाटाय् वनाच्वंंसां नं खाद्य उद्योग धाःसा वंगु झिंछदँ निसें निरन्तर नाफा वनाच्वंगु दु । वय्कलं धयादिल, ‘झिंछदँया दुने २ करोड २० लाखं निसें म्होति ४० लाख तका नाफाय् वनाच्वंगु दु ।’

कम्पनीयात नाफाय् यंकेगु निंतिं आधुनिक प्रविधि छ्यलेगुया लिसें बिलिङ प्रणालीयात नं नाला कायेगु ज्या जूगुलिं नं सफलता चूलाःगु खः । वय्कःया कथं आर्थिक दँ २०५८÷०५९ न्ह्यः नं कम्पनी नाफाय् सञ्चालन जुयाच्वंगु खः । वयां लिपा मैदाय् भ्याट लगे जूगु, बजारय् खनेदुगु न्यून विजिकरण, अस्वाभाविक प्रतिस्पर्धाया हुनिं २०६३ सालय् कम्पनी करिब झिंखुला बन्द जूगु खः । उकियात पुनः संरचना यानाः हाकनं कम्पनी सञ्चालनय् वःगु खः । देय् संघीयताय् वनेधुंकूगुलिं आः कम्पनीयात नं उगु हे कथं न्ह्याकेगु योजना जुयाच्वंगु जानकारी नं वय्कलं बियादिल ।

महाप्रबन्धक जोशीं वइगु न्हिं सरकारं खाद्य सम्बन्धी नालाकाइगु नीतिया आधारय् कम्पनीं माःगु प्लान्ट तयेगु तयारी जुयाच्वंगु खँ कनादिल ।
वय्कलं धयादी, ‘जर्मनी व चेक गणतन्त्रं मेसिन न्यायेगु तयारी जुयाच्वंगु दु । कम्पनीं मैदा, छुचुं, सुजीया लिसें बाई प्रडक्टया रुपय् चोकर उत्पादन यानावयाच्वंगु दु । कम्पनीं स्वदेशय् हे उत्पादन जूगु कच्चा पदार्थ छ्यलेगु यानाच्वंगु खँ नं वय्कलं कनादीगु दु ।