पेट्रोलियम पदार्थया भाः क्वकायेगु तयारी
येँ (नेपालभाषा टाइम्स)÷नेपाल आयल निगमं पेट्रोलियम पदार्थय् स्वचालित प्रणाली लागू यायेगु निर्णय याःगु दु । निगम सञ्चालक समितिं म्हिगः चान्हय्निसें स्वचालित मूल्य प्रणाली लागू यायेगु निर्णय याःगु खः ।
न्हूगु नियम कथं आः निगमं डिजेलय् थःगु तूगु भाः स्वयां निगू प्रतिशत व पेट्रोलय् २.५ प्रतिशत लबः तयाः भाः क्वःछी । उकथं हे निगमं जा थुइगु ग्यासय् धाःसा लबः मतयेगु निर्णय याःगु दु ।
थुगु निर्णय कथं आः पेट्रोल लिटरय् खुतका, डिजेल व मचिकनय् प्यतका प्यतका भाः कुहां वइसा ग्यासय् झितका भाः कुहां वइगु जूगु दु ।
थ्वहे झ्वलय् म्हिगः पेट्रोलियम पदार्थया भाः कुहां वइगु हल्ला सुथय् सार्वजनिक जुइवं पम्पवालतय्सं म्हो जक पेट्रोलियम पदार्थ काःगु कारणं निगमयात ६५ करोड तका द्यापं लाःगु दु ।
निगमयात न्ह्यथँसें म्हिगः सुथय् डिजेल, पेट्रोल, मचिकं व जा थुइगु ग्यासया भाः कुहां वइगु हल्ला जूगु खः । निगमया कथं म्हिगः जक मेमेगु न्हि स्वयां नं म्हो जक पेट्रोल व डिजेल ढुवानी जूगु दु । थानकोट डिपोया कथं म्हिगः पेट्रोल व डिजेल यानाः ४ लाख स्वयां अप्वः पेट्रोलियम पदार्थ ढुवानी कटौती जूगु दु ।
म्हिगः पम्पवालातय्सं डिजेलय् जक लिटरं १० तका कुहां वइगु अनुमान यासें डिपोय् पेट्रोलियम पदार्थ मकाःगु खः । लिटरं १० तका कुहां वल धाःसा थःपिंत म्होतिं नं निगू लाख स्वयां अप्वः द्यापं फयेमालीगु जुयाः पेट्रोलियम पदार्थ मकाःगु खः ।
मेखे निगमं धाःसा भाः कुहां वइगु कारणं पेट्रोलियम पदार्थ मीगु म्हो जूगु मखुसें वा वयाच्वंगुलिं पेट्रोलियम पदार्थ मीगु म्हो जूगु खँ धाःगु दु ।
थ्वहे झ्वलय् भारतीय आयल कर्पोरेशन (आईओसीं) निगमयात पेट्रोलियम पदार्थया न्हूगु भाः छ्वयाहःगु दु । न्हूगु भाः कथं पेट्रोलय् ३४ पैसा क्वकयाः छ्वयाहःगु दुसा डिजेलय् २ तका ४७ थकयाः छ्वयाहःगु दु । भाः थकयाः वःसां नं निगमयात थौंकन्हय् फुक्कं पेट्रोलियम पदार्थय् लबः हे जुयाच्वंगु दु ।
LEAVE YOUR COMMENTS