थनिंनिसें सहकारीं त्यासाय् १६ प्रतिशतं अप्वः ब्याज कायेमदइगु
येँ – सरकारं सहकारी संस्थातय्सं त्यासाय् १६ प्रतिशतं अप्वः ब्याज काये मदइगु धकाः हःगु व्यवस्था थनिंनिसें लागु जुइगु दु । सहकारी संस्थातय्सं थिकेक ब्याज कयाच्वंगु धकाः यक्व हे गुनासो वयेधुंकाः सरकारं शुक्रवाः सहकारी संस्थातय्सं निक्षेपय् बीगु ब्याज व त्यासाय् काइगु ब्याजया सीमा तोके याःगु खः ।
सरकारं तोके याःगु सीमा कथं निक्षेपय् बीगु ब्याजया निंतिं त्यासाया ब्याजदरया अन्तर वा स्प्रेद दरय् ६ प्रतिशत कायम याःगु खः । थ्व सीमा कथं आवंलिं सहकारी संस्थातय्सं त्यासाय् अप्वलय् १६ प्रतिशत जक ब्याज काये दइसा निक्षेपय् १० प्रतिशतं अप्वः ब्याज बीदइमखु ।
थौंकन्हय् सहकारी संस्थातय्सं २५ प्रतिशत तक नं ब्याज कया च्वंगु दु ।
सहकारीतय्सं त्यासा बीबलय् थीथी शुल्कसहित काइबलय् त्यासा काइपिं सहकारीया दुजःपिंसं २५ प्रतिशत स्वयां अप्वः तकं ब्याज पुलेमाःगु अवस्था वयाच्वंगु खः । आः सहकारी विभागं त्यासा व निक्षेपय् ब्याजया सीमा तोके यायेधुंकाः त्यासा काइपिं दुजःपिंत यक्व सहुलियत जुइगु जूगु दु ।
तर थ्व सीमायात सहकारीइ अनिवार्य कथं लागू याकेगु निंतिं धाःसा चुनौती दु । सहकारी ब्याज कायेबलय् सरकारं तोके यानातःकथं १६ प्रतिशत जक कायेगु याःसां मेमेगु शुल्क थप यानाः ग्राहकपाखें थप ध्यबा कायेफुगु खँ सहकारीया दुजःपिंसं धाःगु दु ।
थ्व व्यवस्थां बचतकर्तातय्सं
अप्वः प्रतिफल कायेखनीगु व ऋणीतय्सं यक्व ब्याज पुलेमाःगु अवस्थाया अन्त्य जुइगु
सहकारी विभागं ब्याजदरया सीमा तोके यायेत दयेकूगु समितिया संयोजक व विभागया रजिस्ट्रार टोकराज पाण्डें सहकारी ऐनय् दुगु व्यवस्था कथं स्वलाय् छक्वः ब्याज दरया सीमाया समिक्षा व अनुमगन यायेफइगु जूगुलिं थुकियात कडा अनुगमन यानाः कार्यान्वयन यायेफइगु खँ धयादीगु दु ।
राष्ट्रिय सहकारी महासंघ, अर्थ मन्त्रालय, राष्ट्र बैंक, राष्ट्रिय सहकारी विकास बोर्ड थेंज्याःगु निकायलिसे सहलह यानाः ब्याज दरया सीमा तोके यानागु खँ वय्कलं धयादीगु दु । निक्षेपकर्तातय्त अप्वः फाइदा व त्यासा काइपिं ऋणीतय्त म्हो नोक्सान जुइकथं थ्व सीमा क्वःछिनागु दावी नं वय्कलं यानादीगु दु ।
विभागं बचत व त्यासाया ब्याजदरया अन्तर अर्थात स्प्रेद डर ६ प्रतिशत स्वयां म्हो यायेगु कथं सन्दर्भ ब्याजदर नं तोके याःगु खँ वय्कलं धयादीगु दु । थुकिया अर्थ सहकारी संस्थातय्सं त्यासाय् १६ प्रतिशत ब्याजदर काल धाःसा बचतय् १० प्रतिशत ब्याज बीमाः, तर त्यासा १६ प्रतिशत स्वयां अप्वः ब्याज कायेदइमखु ।
रजिस्ट्रार टोकराज पाण्डें विभागं याःगु थ्व व्यवस्थां बचतकर्तातय्सं अप्वः प्रतिफल कायेखनीगु व ऋणीतय्सं यक्व ब्याज पुलेमाःगु अवस्थाया अन्त्य जुइगु विश्वास नं प्वंकादीगु दु । विभागं क्वःछिउगु थ्व ब्याजदर देय्न्यंकंया सहकारी संस्थातय् निंतिं समान कथं हे लागू जुइ । विभागं क्वःछिउ कथं ब्याज कालबिल मजुल धाःसा कानुनी व्यवस्था कथं कारवाही न्ह्याकेगु खँ वय्कलं धयादीगु दु ।
थौंकन्हय् देन्यंकं ३४ हजार ८३७ गू सहकारी संस्था दुसा थुकी बचत तथा ऋण सहकारी संस्था जक थ्यंमथ्यं १४ हजार दु । अले बचत तथा ऋण सहकारीइ जक निक्षेप थ्यंमथ्यं निगू खर्ब १७ अर्ब ५० करोड दुसा त्यासा छगू खर्ब ७९ अर्ब ८८ करोड दु । फुक्कं सहकारीतय्गु ल्याःचाः यायेबलय् स्वंगू खर्बं मल्याक निक्षेप दुसा पौने ३ खर्ब त्यासा पिहां वनाच्वंगु दु ।
LEAVE YOUR COMMENTS