पर्यटन विकासया निंतिं किपुली एकीकृत योजना
किपू- किपुली पर्यटन विकास यायेगु निंतिं एकीकृत पर्यटन विकास परियोजना दयेकाः न्ह्याः वनीगु जूगु दु । आर्थिक दँ २०७५÷७६ या नीति तथा कार्यक्रम व बजेट सार्वजनिक यासें किपू नगरपालिकाया मेयर रमेश महर्जनं किपूया आर्थिक विकासया निंतिं पर्यटन क्षेत्रयात प्राथमिकता बियाः न्ह्याः वनेगु खँ धयादीगु खः ।
किपू लागाय् लाःगु चम्पादेवी, बाघभैरव, तौदह, जलविनायक, चिलंचाे विहार, उमा महेश्वर थेंज्याःगु धार्मिक, सांस्कृति रुपं नं महत्वपूर्ण थाय्यात पर्यटकीय क्षेत्र कथं विकास यायेगु निंतिं एकीकृत पर्यटन परियोजना दयेकाः न्ह्याः वनेगु खँ वय्कलं धयादीगु खः । थ्व झ्वलय् वयकलं किपूया वडा नं. १, २, ३ १० या खुल्ला क्षेत्रय् पार्क दयेकेत भौतिक निर्माण ज्या न्ह्याये धुंकूगु खँ न्ह्यथँसें तौदह व जलविनायकया विकासया निंतिं विशेष ज्या जुइगु खँ धयादीगु खः । अथेहे वय्कलं चम्पादेवीइ केबुलकार अध्ययनया निति बजेट फ्यानागु खँ नं धयादीगु दु ।
किपुली त्वनेगु लःया व्यवस्था यायेत नं महत्वपूर्ण थाय् बियाः ज्या न्ह्याकागु खँ नं वय्कल कनािदल । ‘याकनं किपूया छेँय् छेँय् लः थ्यंकेगु निंतिं ज्या न्ह्याकाच्वनागु दु’ वय्लंक धयादिल ।
अथेहे किपू नगरपालिकापाखें न्ह्याकाच्वंगु कीर्तिपुर अस्पतालय् नं डायलासिसया व्यवस्था यायेत बजेट छुटे याःगु दुसा विष्णुदेवी अस्पतालयात स्थान्तरण याना हयेगु खँ नं वय्कलं धयादीगु दु ।
किपूया स्कुलय् स्थानीय भाययात नं पाठ्यक्रमय् दुथ्याकेगु खँ न्ह्यथँसें वय्कलं थनया स्कुलयात सुचना प्रविधि मैत्री दयेकेगु खँ धयादीगु दु ।
अथेहे सार्वजनिक जग्गा, फल्चा, सतः संचालन यायेगु निंतिं नगरपालिकां छगू कानून हे हयाः संरक्षण यायेगु खँ नं वय्कलं धयादीगु दु । थुकिया निंतिं ज्या न्ह्यानाच्वंगु खँ नं मेयर महर्जनं धयादिल ।
किपू नगरपालिकां चालु आर्थिक दँया निंतिं छगू अर्ब २७ लाख ३० हजार तकाया बजेट विनियोजन याःगु खः । थुकी चालु पाखे ३३ करोड २३ लाख खर्च याइगु जूगु दुसा विकास निर्माणया ज्याया निंतिं पुँजीगत खर्च पाखे ६७ करोड ४ लाख ३० हजार तका बजेट फ्याःगु दु ।
बजेट सार्वजनिक यायेगु ज्याझ्वलय् मू पाहाँ पाखें न्ववासें संस्कृति पर्यटन तथा नागरिक उड्डयन मन्त्री रविन्द्र अधिकारीं किपूया पर्यटन विकासया निंतिं गुरुयोजना दयेकेत सुझाव बियादिसें किपुली वइपिं पर्यटकतय्त छन्हु निन्हु अन हे बाय् तये फइकथं स्टार होटल दयेकेत किपू नगरपालिकां निजी ख्यःयात आह्वान यायेमाःगु बिचाः प्वंकादिल ।
वय्कलं धयादिल, ‘पर्यटन विकासया निंतिं निजी ख्यःयात लगानी यायेत आह्वान यानादिसँ, अले माःगु थाय् बीत नगरपालिकां पहल यानादिसँ ।’
अथेहे पाहाँया कथं न्ववानादिसें प्रदेश नं. ३ या भौतिक योजना मन्त्री केशव स्थापितं किपू नपा दुने लाःगु हिमाल सिमेन्ट दुगु थासय् ड्राइ पोर्ट दयेकेगु खँ वयाच्वंगुयात न्ह्यथँसें अन ड्राइ पोर्ट दयेकेगु मखु, थीथी कला दुथ्याकाः संग्रहालय दयेकेमाः धयादिल । वय्कलं धयादिल, ‘नामं हे ड्राइ धाःथें सिना वनीगु मखु, स्वां थें ह्वइगु बांलाःगु कलाकृतिया संग्रहालय दयेकाः किपूया कीर्ति तयेमाः ।’
ज्याझ्वलय् न्ववानादिसें किपू नपाया उपमेयर सरस्वती खड्कां वंगु आर्थिक दँय् ९० प्रतिशतं मल्याक पूँजीगत खर्च यानागु धासें थुगुसी नं नागरिक समाज, राजनीतिक दल लिसे सहलह यानाः बजेट व कार्यक्रम दयेकागु खँ कनादिल ।
ज्याझ्वलय् बडि बिल्डिङ कासाय् अन्तर्राष्ट्रिय पदक त्याकातःम्ह किपूया म्ह्याय्मचा ननिता महर्जनयात हनापौ व झिद्वः तका नं लःल्हाःगु खः ।
LEAVE YOUR COMMENTS