प्रदेश ३ या संसदय् नेवाः भासं सम्बोधन

हेटौंडा –  विवेकशील साझा पार्टीया सांसद शोभा शाक्यं प्रदेश नं. ३ या संसदय् नेपालभाषां सम्बोधन यानादीगु दु । सोमवाः वय्कलं संसदय् करिब ९ मिनेट नेपालभाषां सम्बोधन यानादीगु खः । थःगु सम्बोधनया झ्वलय् वय्कलं दकलय् न्हापां हे बारा व पर्साय् धाकुफय् वयाः जूगु क्षतिया लागिं दुःख प्वंकुसें उकी लानाः प्रभावित जूपिंत ३ नम्बर प्रदेश सरकारपाखें ग्वाहालि यायेत माग यानादिल ।

३ नम्बर प्रदेशय् लाःगु यल देय्–यात हस्तकला नगरी धकाः घोषणा याःगु लसताय् आः ३ नम्बर प्रदेश सरकारपाखें उकियात ल्वय्क छगू प्रदेश स्तरीय कला ग्यालरी चायेकेमाःगु सुझाव नं बियादिल । यल देय्यात हस्तकला नगरी धकाः घोषणा याःगु ३ नम्बर प्रदेशया लागिं हे गौरवया विषय जूगु खँ नं वय्कलं कनादिल ।अथे हे स्वनिगः दुने दयेकीगु छेँया मापदण्ड बांलाक लागू यायेमाः धासें थनया छेँयात परम्परागत शैलीं दयेकेमाःगु खँय् नं बः बियादिल ।

अथे हे ३ नम्बर प्रदेशया स्थायी राजधानी व नां याकनं तोके यायेमाःगु माग नं वय्कलं यानादिल । वय्कलं नेवाः भासं न्ववानादीवं हलय् खासखुस शुरु जूगु खःसा मथूपिंसं थूपिंके छु धाःगु धकाः न्यनेगु नं शुरु याःगु खः । वय्कःयात नेवाः भासं न्ववायेगु अनुमति सभामुख सानु श्रेष्ठं बियादीगु खः । नेपालभाषां न्ववायेगु बारे पार्टीयात छुं जानकारी मबियागु खँ कसें सांसद शाक्यं लिपा लिपा नं नेवाः भासं न्ववायेगु कुतः यायेगु खँ ‘नेपालभाषा टाइम्स’ यात कनादिल ।

सम्बन्धित बुखँ

LEAVE YOUR COMMENTS