राष्ट्र संघय् पीडितया ज्ञापन
आदिवासी विस्थापित जुइगु लगानी मयायेत इनाप
येँ- सतक विस्तार पीडित संघर्ष समितिं म्हिगः संयुक्त राष्ट्र संघीय ज्याकुथी ज्ञापनपौ बिउगु दु । कन्हय् चैत १५ व १६ गते नेपाल सरकारं यायेत्यंगु ‘नेपाल लगानी सम्मेलन २०१९’ यात लक्षित यानाः उगु ज्ञापनपौ बिउगु खः ।
ज्ञापन पतिइ विश्व समुदाय, लगानीकर्ता व साझेदार (नेपाल सरकारया शब्दय्) तय्त आदिवासी, स्थानीय समुदाय व सर्वसाधारण जनतायात विकास निर्माणया क्रियाकलापं लानाच्वंगु गम्भीर नकारात्मक लिच्वः, मानव अधिकार हनन, अन्तर्राष्ट्रिय कानुनया उल्लंघन यानाच्वंगु धासें स्थानीय वासीयात लिच्वः लाइगु कथं गुगुं नं कथंया आयोजनाय् लगानी मयायेत इनाप यानातःगु दु ।
अथे हे ज्ञापन पतिइ आदिवासी व स्थानीय सर्वसाधारण जनतायात गुगुं नं कथंया जानकारी व परामर्श मयासे हःगु भू उपयोग नीति, जलस्रोत ऐन लगायत कानुन हयेत्यंगु व ‘राष्ट्रिय प्राथमिकता प्राप्त आयोजनाया द्रुतमार्ग निर्माण तथा विकास सम्बन्धय् व्यवस्था यायेत हयेत्यंगु विधेयक २०७५’ थेंज्याःगु कानुनं जनताया हित कुण्ठित याइगु, दिगो विकास विरुद्ध द्वन्द्व हये फइगु धासें संयुक्त राष्ट्र संघया ध्यानाकर्षण याकूगु दु ।
ज्ञापनपत्र लः ल्हाना कासें संयुक्त राष्ट्र संघया निमित्त रेजिडेन्टल कोअर्डिनेटर रामबाहु साहं स्थानीय जनतायात माग प्रति संयुक्त राष्ट्र संघ सकारात्मक जूगु धासें उकिया निंतिं थःपिंसं माःगु थासय् ज्ञापन पौ थ्यंका बीगु बचं बियादीगु दु । म्हिगः ¥याली लिपा पत्रकार श्रीकृष्ण महर्जनं ज्ञापन पौ ब्वनाः न्यंकादीगु खःसा संघर्ष समितिया संयोजक सुमन साय्मिं लःल्हानादीगु खः ।
ज्ञापन पौ बी स्वयां न्ह्यः कुपन्डोल निसें संयुक्त राष्ट्र संघया ज्याकुथी तक नेवाः झाँकी सहित ¥याली पिकाःगु खः । थ्वहे झ्वलय् सतक विस्तार पीडित संघर्ष समितिं थौं थनया एफ टेन पार्टी प्यालेसय् छगू पत्रकार सम्मेलन यायेत्यंगु दु । दातृ निकायया सम्मेलनयात लक्षित यानाः पत्रकार सम्मेलन यायेत्यनागु खँ संघर्ष समितिया संयोजक सुमन साय्मि ‘नेपालभाषा टाइम्स’ यात कनादीगु दु ।
सम्मेलन न्ह्यः हे नेपालय् दुगु थीथी देय्या राजदूतावास निसें कुटनीतिक नियोगयात ज्ञापन पौ बीधुंकाः आः पत्रकार सम्मेलन मार्फत नं उकिया जानकारी लगानीकर्ता सम्मेलनय् वइपिंत लक्षित यासें ग्वसाः ग्वयागु जानकारी नं वय्कलं बियादिल ।
LEAVE YOUR COMMENTS