येँ व यलय् न्हूदँ छन्हुं हे

येँ – स्वन्ति नखः गबले हनेगु धइगु तिथि विवादं यानाः लक्ष्मीपुजा, म्हपुजा व किजापुजा न्यायेकेगु अन्यौल पिहां वःसां नेपाल संवत्या न्हूदँ धाःसा येँ व यलय् छन्हुं हे हनीगु जूगु दु ।

येँया थीथी जातीय व भाषिक पुचः–तय्सं कार्तिक ११ गते लक्ष्मीपुजा, १२ गते म्हपुजा व १३ गते किजापुजा यायेगु निर्णय याःगु दुसा यलया थीथी भाषिक व जातीय खलः पुचःतय्सं कार्तिक १० गते लक्ष्मीपुजा, ११ गते म्हपुजा व १२ गते नेपाल संवत्या न्हूदँ लिसें किजापुजा न्यायेकेगु निर्णय याःगु दु ।

येँ व यलय् स्वन्ति नखः हनेगु न्हि च्वय् क्वय् लाःसां नेपाल संवत्या न्हूदँ हनेगु न्हि धाःसा छन्हुं हे लाःगु दु । कार्तिक १२ गते कुन्हु हे येँ व यलय् न्हूदँ हनेगु निर्णय जूगु खः ।

किजापुजा धाःसा येँय् कार्तिक १३ गते हनेगु निर्णय जूगु दुसा यलय् कार्तिक १२ गते कुन्हु हे न्हूदँया ज्याझ्वः लिपा किजापुजा नं यायेगु निर्णय जूगु दु । यलय् नेपालभाषा मंकाः खलः, बौद्ध विहार संघ, ज्यापु समाज लगायत थीथी खलः पुचःतय् दथुइ म्हिगः जूगु बैठकं थ्व निर्णय याःगु खः ।