पीच मयाःगुलिं वादेय् आन्दोलन

वार्ता याः वःपिं सांसदतय्त पीडित जनताया नाराबाजी

यल – ध्वंला हितिंनिसें वाडे तकया सतक पीच यायेमाःगु माग यासें स्थानीय जनतां न्ह्याकाच्वंगु अनिश्चितकालीन आन्दोनलं अझ हे निरन्तरता काइगु खँ धाःगु दु । उगु थासय् इलय् हे पीच मयाः धासें स्थानीय जनतां वंगु छुं न्हिं न्ह्यवंनिसें सतक बन्द यानाः आन्दोलन याना वयाच्वंगु खः ।

थ्वहे झ्वलय् म्हिगः स्थानीय जनतां छगू तःधंगु ¥याली पिकयाः गोदावरी नगरपालिका घेराउ यायेत्यंगु खःसां मेयर गजेन्द्र महर्जनं घेराउ न्ह्यः स्थानीय जनतायात लँ दथुइ हे नापलानाः सतक विभागनाप वार्ता यायेत थम्हं पहल यायेगु धासें स्थानीय जनतायात हे यलया सतक विभाग तक यंकूगु खः ।

अन यलया सांसदपिं पम्फा भुसाल, नवराज सिलवाल, नेपाली कांग्रेसया नेता लिसें पुलांम्ह अर्थ राज्यमन्त्री उदय शमशेर, मेयर गजेन्द्र महर्जन व सतक विभाग यल जिल्लाया प्रमुख दथुइ सहलह जूगु खः । उगु सहलहय् पीडित जनतायात धाःसा समावेश मयाःगुलिं स्थानीय जनतां विरोध याःगु दु ।

घन्टौं तक सहलह लिपा पिहां वःम्ह सांसद सिलवालं सतक पीत यायेगु जिम्मा थम्हं कायेगु धाःगु खःसा स्थानीय जनतां जिम्मा बीत थःपिं तयार दुगु तर उकिया ‘डेडलाइन’ क्वःछीमाः धकाः अडान काःगु खः । स्थानीय जनतां डेडलाइन बीत थःपिं तयार दुगु तर इलय् ज्या मजुल धाःसा सांसद सिलवालयात राजीनामा बीगु खःला धकाः न्ह्यसः तयेवं सिलवाल नाजवाफ जूगु खँ स्थानीय अभियन्ता अशोक महर्जनं ‘नेपालभाषा टाइम्स’ यात कनादिल ।

आन्दोलनया नेतृत्व यानाच्वंम्ह बिष्णुभगत नकःमिं ‘नेपालभाषा टाइम्स’ लिसे खँ ल्हासें सतक विभागय् पिहां वयाः नेतातय्सं खँ तयेवं आन्दोलनकारीतय्सं उमिगु विरुद्ध नाराबाजी याःगु खः । उमिसं अर्कमण्य जनप्रतिनिधि म्वाः धकाः नारावाजी याःगु खः । थुकिया दथुइ म्हीग सरकारी पुचः व स्थानीय जनताया दथुइ वार्ता जूगु खःसां नं वार्ता धाःसा सफल मजूगु खँ नं धाःगु दु ।

सरकारी पुचलं उगु लागाय् सतक विस्तारया झ्वलय् लाःगु जूगुलिं छेँ मथुंकं सतकय् पीच याये मफइगु खँ धाःगु खः । तर स्थानीय जनतां धाःसा उचित क्षतिपूर्ति मबीकं छेँ थुनेत थःपिं तयार मदु धायेवं वार्ता असफल जूगु खः । स्थानीय जनतां सर्वोच्च अदालतया आदेश कथं थःपिंत क्षतिपूर्ति बीमाःगु माग याःगु खःसा सरकारी पुचलं धाःसां क्षतिपूर्ति बीगु निंतिं थःपिंके बजेट मदुगु धासें क्षतिपूर्ति बीमफइगु खँ धाःगु खः ।

स्थानीय जनतां थौंकन्हय् सतकया स्थिति गथे दु अथे हे सतक पीच यायेमाःगु माग याःगु खः । स्थानीय जनतां मन्त्रिपरिषद्या निर्णय कथं आः सतकया अवस्था गथे दु अथे हे पीच यायेमाःगु खँ धायेगु यानाच्वंगु दु । स्थानीय जनतां सतक पीच मयाःतले थःपिनिगु अनिश्चितकालीन आन्दोलन जारी जुइगु खँ धाःगु दु ।

स्थानीय जनताया आन्दोलनया कारणं नियमित रुपं अस्पतालय् वासः यायेत वनेमाःपिं छुं जनता धाःसा पीडित जुयाच्वंगु दु । तर स्थानीय जनतां धाःसा थःपिंसं विरामी ल्ह्यइगु एम्बुलेन्स व विरामीयात छुट बियागु खँ धाःगु दु ।

 

सम्बन्धित बुखँ

LEAVE YOUR COMMENTS