ने. सं. ११४३ चौलाथ्व पारू -

छत्रपाति चिकित्सालयया ६१ क्वःगु बुदिं

येँ – छत्रपाति निःशुल्क चिकित्सालयया ६१ क्वःगु बुदिं ज्याझ्वः हंगु दु । चिकित्सालयया अध्यक्ष विजयबहादुर मालीया सभापतित्वय् जूगु ज्याझ्वःया उलेज्या मूपाहां रक्षामन्त्री भीमसेनदास प्रधानं यानादीगु खः । ज्याझ्वलय् मूपाहां रक्षामन्त्री प्रधानं चिकित्सालयय् २० दँ स्वयां अप्वः सेवा यानादीपिं डा. विजयबहादुर राजभण्डारी लगायत थीथी व्यक्तित्वपिंत सम्मान यानादीगु खः । ज्याझ्वलय् नवासें वय्कलं शिक्षा व स्वास्थय निःशुल्क यायेगु हे समाजवाद उन्मु सरकार कायम यायेगु मू आधार जूगलिं सरकारं नं उकथं हे ज्या शुरु याये धुंकूगु धासें सरकारं ‘जिगु दँ’ धकाः स्वास्थ्य सेवा शुरु याःगु जानकारी बियादिल ।

ज्याझ्वलय् पुलांम्ह मन्त्री राजेन्द्र श्रेष्ठं राज्यं तःधंपिंत जक स्वास्थ्य सेवा बिया वयाच्वंगु तर सर्वसाधारण वासः याये मखना सी माःगु अवस्थाय् थ्यनाच्वंगुयात पनेगु निंतिं थज्याःगु चिकित्सालयं महत्वपूर्ण भूमिका म्हिता वयाच्वंगु धासें थज्याःगु निःशुल्क चिकित्सालयं सेवा विस्तार याना वनेमाःगु खँय् बः बियादिल । अथे हे प्रदेशसभाया सांसद वसन्त मानन्धरं शिक्षा व स्वास्थ्य मौलिक अधिकारकथं संविधानय् न्ह्यथनातये धुंकूगु अवस्थाय् आः उकियात कार्यान्वयन याना यंकेमाः धयादिल । ज्याझ्वलय् नारायणभक्त श्रेष्ठ व नारायणदेवी श्रेष्ठं चिकित्सालयया अध्यक्ष मालीयात स्वंगू लाखतका दांया चेक लःल्हानादीगु खः । चिकित्सालयं वइगु दँय् न्हूगु भवन दयेकेगु लक्ष्य कयातःगु दु ।