ने. सं. ११४४ कौलाथ्व पारू - नःलास्वनेगु

नेवाः स्यनामिलिसे शिक्षक संघया अन्तक्र्रिया

येँ (नेपालभाषा टाइम्स)- येँ मनपा दुनेया थीथी सामुदायिक स्कुलय् नेपालभाषा ब्वंकीपिं स्यनामितलिसे म्हिगः नेपाल शिक्षक संघं अन्तक्र्रिया यात । चाबहीया पशुपति माविइ छगू ज्याझ्वः यासें मनपा दुनेया सरकारी स्कुलय् नेपालभाषा ब्वंकीपिं १७२ म्ह स्यनामिलिसे उगु अन्तक्र्रिया याःगु खः ।

ज्याझ्वलय् जूगु पुचः सहलहपाखें स्यनामिपिंसं थःपिंत जुयाच्वंगु थीथी समस्यात च्वयाः बिउगु खःसा उकियात बुँदागत यासें १३ बुँदाया समस्या शिक्षक संघया येँ मनपा स्थानीय अध्यक्ष मेघराज बन्जारायात लःल्हाःगु खः ।

स्यनामितय्सं थःपित इलय् तलब मवइगु, नेपालभाषा बाहेक मेमेगु विषषया अप्वः कक्षा कायेके बीगु, स्थायी याके माःगु, शैक्षिक सामग्रीया व्यवस्था यायेमाःगु, नियमित तालिम बीमाःगु आदि समस्यात च्वयाः बिउगु खः ।

उगु समस्यात नेवाः स्यनामि दबूया छ्यांज्य बरुणप्रसाद वैद्यं लःल्हानादीगु खः । समस्याया बुँदात लःल्हाना कासें संघया महानगर कमिटी अध्यक्ष बन्जारां थ्व समस्या समाधान यायेगु लागिं थःपिंसं कुतः यायेगु बचं बियादिल ।

ज्याझ्वलय् न्ववासें नेपाल शिक्षक संघ येँ जिल्ला अध्यक्ष मञ्जु श्रेष्ठ, पशुपति माविया प्रधानाध्यापक चन्द्रकान्त पण्डित, स्यनामि देव आनन्द महर्जन, नेपालभाषा टाइम्सया सम्पादक सुरेश किरणंपिं नेपालभाषा येँ देय्या मू भाषा जूगु कारणं थुकिया पठनपाठनयात स्थापित यायेमाःगु धासें नेवाः स्यनामपिंसं यानाच्वंगु ब्वंकेज्यायात च्वछायादीगु खः ।