ब्वगी वनेगु क्वचाल

यल(नेपालभाषा टाइम्स)- गुंलाथ्व पारुं शुरु जुयाः नाग पंचमि तकया दुने क्वचायेकेमाःगु ब्वगी वनेगु क्वचाःगु दु । थनया प्यंगः थूर, चैत्य, चीभाः देगः, मठमन्दिर आदि चान्हसिया इलय् चाःहिलीगुयात ब्वगी वनेगु धाइगु खः ।

दँय्दसं गुंलागा दुतियाकुन्हु न्यायेकीगु धार्मिक व ऐतिहासिक मतयाः स्वयां न्ह्यः ब्वगी वनेगु चलन दु । ब्वगी वनेगुयात मतयाः न्ह्याइगु लँ स्वः वनेगुकथं नं कयातःगु दु । थुगुसी मतयाः ग्वसाः ग्वयेगु पाः क्वबहाः त्वाःया खः । थ्व ल्याखं क्वबहालं ब्वगी वनेगु शुरु जूगु खः ।

गुंलाथ्व पारु कुन्हुनिसें चान्हसिया इलय् ब्वगी वनेगु ज्या जुइ । परम्परागत रुपं मतयाः न्ह्याका वयाच्वपंगु लँपु जुयाः ब्वगी वनेगु याइ । द्यः तुयू मजूतले वनीगु ब्वगीया झ्वलय् द्यः तुइवं ब्वगी वनेगु दिकी ।

मतयाः ग्वसाः ग्वइगु त्वालं ब्वगी न्ह्याकाः गन ब्वगी वनेगु दिकूगु खः कन्हय्कुन्हु व हे थासं हाकनं ब्वगी वनेगु याइ । ब्वगी वनीगु इलय् बोधिचर्या म्येँ हालाः वनेगु चलन दु । थथे ब्वगी वनीबलय् लँपुइ लाःगु थीथी बौद्ध देगः, चीभाः, चैत्य पुजा यायां वनेगु चलन दु । ब्वगी वनेगु धइगु थः दिवंगत छेँजःपिनि सुखावति भुवनय् वास लायेमा धइगु कामना यासे बहाः बही, चैत्य, चीभाः, गुम्बा आदि धार्मिकस्थल चाःहिलेगु खः ।

जुजु बालार्चन देवया पालंनिसें मतयाः वनेगु शुरु जूगु धइगु विश्वास यानातःगु दुसा ब्वगी वनेगु परम्परा गबलेनिसें शुरु जुल धइगु बारे छुं सीमदुनि ।