भारतय् थ्व इलय् अनया क्वय्या संसद लोकसभाया निंतिं चरणवद्ध रुपं चुनाव जुयाच्वंगु दु । गुलिखे थासय् चुनाव क्वयेधुंकूगु दुसा गनं चुनाव याये ल्यं दनि । थ्व झ्वलय् चुनावी प्रचार प्रसारया निंतिं चुनावी सभा नं गाक्कं जुयाच्वंगु दुसा सामाजिक संजालया प्रयोग नं उतिकं अप्वयाच्वंगु दु ।

थ्व हे झ्वलय् सामाजिक संजालय् छगू भिडियो व्यापक भाइरल जुयाच्वंगु दु । छम्ह स्वांमां क्वखायातःम्ह मनू मेपिं प्यम्ह न्याम्ह मनूया न्ह्यःने दनाः भाषण यानाच्वंगु दु । भाषण यायां हे वयागु पाइन्ट स्वाराक्क कुहां वइ । सकलें ह्वार्रर न्हिली । थ्व दृश्य दुगु भिडियो थ्व इलय् भाइरल जुयाच्वंगु खः ।

उगु भिडियोयात कयाः भाजपाया समर्थकं कांग्रेस समर्थकयात व्यंग्य यायेत व कांग्रेस समर्थकं भाजपाया व्यंग्य यायेत व्यापक प्रयोग यानाच्वंगु दु । अझ छथ्वःसिनं ला उम्ह भाषण बियाच्वंम्ह मनू भाजपाया नेता जूगु व राजस्थानया अजमेरं उम्मेदवारी बियाच्वंम्ह राकेख पारेख जूगु दावी याना वयाच्वंगु दु ।

मेखे भाजपा समर्थकतय्सं नं उम्ह मनू कांग्रेसया उम्मेदवार धकाः भिडियो पोष्ट व सेयर यानाच्वंगु दु । भारतया संसदीय चुनावया झ्वलय् भाइरल जूगु उगु भिडियोया वास्तविकता धाःसा मेगु हे दु । उम्ह मनू न त भाजपाया नेता खः न त कांग्रेसया हे । भिडियाय् खने दुम्ह मनू उत्तराखण्डया जसपुर नगर परिषद्या अध्यक्ष मोहम्मद उमर सिद्धिकी खः ।

अले व भिडियो नं आःयागु मखसे नगरपालिकाया निर्वाचनया इलय् कयातःगु खः । नगरपालिकाया निर्वाचनया इलय् जूगु छगू ज्याझ्वःयात संबोधन यानाच्वंगु इलय् सिद्धिकीया पाइन्ट कुहां वःगु खः । सिद्धिकी भाजपा व कांग्रेस निगुलिं पार्टीया उम्मेदवार मखु ।

स्वयम सिद्धिकीया कथं उगु इलय् थः बहुजन समाजवादी पार्टीइ दुगु व चुनावी अभियानया इलय् संबोधन यायां पाइन्ट कुहां वःगु वयागु धापू दु । वास्तवय् उगु भिडियो भाइरल जूगु कारण सिद्धिकी व पारेखया ख्वाः मिले जूगुलिं खः ।

सम्बन्धित बुखँ

LEAVE YOUR COMMENTS