
वासिङ्टन (एजेन्सी) – अमेरिकाय् अश्वेत नागरिक जर्ज फ्लोयड सीधुंका अन विरोध प्रदर्शनत तच्वयावंगु दु । १६ राज्यया २५ स्वयां अप्व शहरय् कर्फ्यू तयातःगु दु । छवाः न्ह्यःनिसें जुयाच्वंगु प्रदर्शन हिसांत्मक जुयावनाच्वंगु दु । सोमवाः सुथय् जक राजधानी वासिङ्टनया राष्ट्रपति भवन न्ह्यःने आपालं प्रदर्शनकारीत जम्मा जूगु खः । उकीया कारणं स्वयम राष्ट्रपति डोनाल्ड ट्रम्प घौछिया निंतिं बंकरय् वना च्वनेमाःगु खः ।
वयां लिपा राष्ट्रपति ट्रम्पं वासिङ्टनय् कफ्र्यूयात अझ कडा यायेगु व अमेरिकी राज्यया गर्भनर व शहरया मयेरतय्सं स्थिति नियन्त्रणय् कायेमफुसा सेनायात छ्यलेगु तकं धयादीगु खः । थ्वहे दथुइ राष्ट्रपति ट्रम्पं छगू ट्वीट यानादिसें थःम्ह थःयात हे सुभाय् बियादीगु दु ।
वय्कलं म्हिग बहनी वासिङ्टन डिसीइ छुं नं कथंया समस्या मजूगु व मिनियापोलिसय् नं अथेहे जूगु धासें थःयात हे सुभाय् बियादीगु खः । वय्कलं ट्वीटय् च्वयादी, ‘म्हिग बहनी डिसीइ छुं समस्या मजू । यक्वसित ज्वन । फुक्कसिनं बांलागु ज्या यात । अत्याधिक बल । प्रभुत्व । अथेहे, मिनियापोलिसया अवस्था नं बांला जू (सुभाय् राष्ट्रपति ट्रम्प) ।’
LEAVE YOUR COMMENTS