प्रदेश १ या राजधानी विराटनगर !

येँ – अन्ततः सत्तारुढ दल नेपाल कम्युनिष्ट पार्टीं प्रदेश नं. १ या राजधानी विराटनगरय् हे तयेगु धकाः निर्णय याःगु दु । उगु प्रदेशया स्थायी राजधानी गन तयेगु धइगु खँय् ताः ई न्ह्यवंनिसें विवाद जुयाच्वंगु खः । प्रदेशया अस्थायी राजधानी थौंकन्हय् विराटनगरय् तयातःगु दुसां स्थायी राजधानी थःथाय् तये हयेमाः धकाः इटहरी, धरान व धनकुटाया स्थानीय जनतां माग याना वयाच्वंगु खः ।

ताःहाकःगु विवाद लिपा आः नेकपां स्थायी राजधानी विराटनगरय् हे तयेगु धकाः निर्णय याःगु खः । प्रदेश नं. १ य् नं नेकपाया हे सरकार दु ।
प्रदेशया स्थायी राजधानी विराटनगरय् हे तयेमाः धकाः नेकपां निर्णया याःसां नेपाली कांग्रेस व संघीय समाजवादी फोरम नं थ्वहे पक्षय् दुगु खँ धाःगु दु ।

प्रदेशया राजधानी विराटनगरय् जूसां स्थानीय तह लगायत थीथी सरकारी ज्याकू धाःसा इटहरी, धरान व सुन्दरहरैंचाय् नं विस्तार यायेगु सहमति जूगु खँ धाःगु दु । नेकपापाखें थ्व निर्णय याःसां अनया प्रदेश सभां थ्वहे अधिवेशनय् थुकिया निर्णय याइगु सम्भावना धाःसा मदुगु खँ धाःगु दु । उखे नेकपाया थ्व निर्णय वयेवं धरान व धनकुटाय् उकिया विरोध यासें राजधानी थःपिंथाय् तये हयेमाः धकाः सतक प्रदर्शन शुरु जूगु दु ।