पद्मरत्न लुमन्ति गुथियात ग्वाहालि

येँ- येँ क्षेत्र नं. ९पाखें प्रतिनिधिसभा सदस्यय् निर्वाचित जुयादीम्ह सांसद कृष्णगोपाल श्रेष्ठं थःगु लछिया तलब पद्मरत्न लुमन्ति गुथियात लःल्हानादीगु दु । सांसद श्रेष्ठं नेवाः न्ह्यलुवा मदुम्ह पद्मरत्न तुलाधरया लुमन्तिइ नीस्वनातःगु गुथियात ग्वाहालिकथं लछिया तलब लःल्हानादीगु खः ।

सांसद श्रेष्ठं थन जूगु छगू बःचाधंगु ज्याझ्वःया दथुइ गुथिया नायः डा. केशवमान शाक्ययात चेक लःल्हानादीगु खः। ज्याझ्वलय् नवासें सांसद श्रेष्ठं ध्यबा गुलि बिल धइगु स्वयां नं थम्हं भाषिक व राजनीतिक आन्दोलनया सहयोद्धा मदुम्ह तुलाधरया लमुन्तिइ वय्कःया सम्मान यायेकथं आर्थिक ग्वाहालि यानागु धयादिल । ज्याझ्वलय् गुथिया न्वकुलिसें मदुम्ह तुलाधरया म्ह्याय् सुम्निमा तुलाधरं नं नुगःखँ प्वंकादीगु खः ।