म्याचुसेट्सय् नेवाः भाय् स्यनेज्या क्वचाल

येँ(नेपालभाषा टाइम्स)÷अमेरिकाया म्याचुसेट्स राज्यय् न्ह्यानाच्वंगु नेवाः भाय् स्यनेज्या क्वचाःगु दु । नेवाः अर्गनाइजेसन अफ न्यू इंग्ल्याण्ड म्यासाचुसेट्सया ग्वसालय् वंगु प्यला न्ह्यवंनिसें नेवाः भाय् स्यनेगु कक्षा न्ह्यानाच्वंगु खः ।

वाःपतिकं न्ह्यानाच्वंगु थुगु कक्षाय् नेवाः भासं खँल्हाबल्हा यायेगु ज्या जुयाच्वंगु खःसा वंगु शनिवाः छगू ज्याझ्वःया दथुइ भाय् स्यनेगु ज्या जूम अनलाइनपाखें क्वचायेकूगु खः ।

संस्थाया नायः समन्तश्री वज्राचार्यया सभापतित्वय् जूगु समापन ज्याझ्वलय् वय्कलं हे लसकुस यानादीगु खःसा मूपाहांकथं झायादीम्ह वल्र्ड नेवाः अर्गनाइजेसन (डब्लुएनओ)या नायः सिजन श्रेष्ठ झायादीगु खः । भाय् स्यनेगु ज्या अमेरिकाया हे शिकागोय् च्वना वयाच्वनादीम्ह साहित्यकार केशरमान ताम्राकारं यानादीगु खः ।

ज्याझ्वलय् मूपाहां श्रेष्ठलिसें क्यानाडाय् च्वँच्वनादीम्ह भाषासेवी दामोदर प्रधानं नं नुगःखँ तयादीगु खः । भाषासेवी प्रधानं विदेशय् च्वनाच्वंपिं नेवाः मस्तय्सं नेवाः भाय् सयेकेगुलिइ अभिरुचि क्यनाहःगु खँय् लसता प्वंकादिसें थुकियात निरन्तरता बिया वनेमाःगु खँय् बः बियादीगु खः ।

भाय् सयेकादीपिं विद्यार्थीतय् मांअबुंपिंसं नेवाः भाय् सयकेगु कक्षाय् ब्वति कायेधुंकाः इमिसं नेपालय् थःथितिपिंलिसे नेवाः भासं हे खँल्हाबल्हा याःगु धासें लसता प्वंकादीगु खः । अथे हे भाय् सयेकादीपिंसं नं थःपिंसं सयेकागु ज्ञानया खँ कनेगु नापं नेवाः म्येँ व हुलाप्याखं नं न्ह्यब्वःगु खः ।

नेपालभाषा टाइम्स

च्वमिया मेमेगु

• कोशी प्रदेश विरुद्धया आन्दोलनय् प्रहरी हस्तक्षेप, आपालं घाःपाः
• रेशम चौधरीयात थौं आम माफी बियाः त्वःतीगु
• भाषा कानून हयेत मन्त्रीया बचं
• जैसीदेवल क्लबया सम्मान ज्याझ्वः
• किपुलिइ दाफा धुकू पासा ज्याझ्वः