कविता लायकूया निक्वःगु अनलाइन काव्य गोष्ठि

येँ(नेपालभाषा टाइम्स)- न्हूपिं कवि मय्जुपिं जक मुनाः नीस्वनातःगु ‘कविता लाय्कू’या निक्वःगु अनलाइन काव्य गोष्ठि वंगु गुंलागा नवमि शनिवाःकुन्हु जुल । नेपालभाषाया चिनाखँ विधायात च्वन्ह्याकेगु व ल्याय्म्हतय्त चिनाखँ विधापाखे नुगः क्वसायेकेगु तातुनाः ‘कविता लाय्कू’ छुं दिं न्ह्यः जक नीस्वंगु खः ।

‘कविता लाय्कू’या नायः नांजाःम्ह भाषाशास्त्रीलिसें समालोचक मय्जु डा. ज्योतिप्रभा तुलाधरया सभापतित्वय् जूगु ज्याझ्वलय् विशिष्ट पाहांकथं नांजाःम्ह कवयित्री मय्जु प्रतिसरा साय्मि झायादीगु खः ।

निक्वःगु संस्करणया काब्य गोष्ठिइ मुक्कं झिम्ह कविपिंसं थःथःगु चिनाखँ न्यंकादीगु खः । ज्याझ्वलय् कविता लाय्कूया दुजःपिं हिसिलिना शाक्य, विनिता वज्राचार्य, रहेना नकःमि मानन्धर, सबिना महर्जन व मंजु श्रेष्ठ सिंहलिसें पाहांकथं झायादीपिं नांजाःपिं कविपिं श्रीराम श्रेष्ठ, पुष्परत्न तुलाधर, सुरेश किरणं नं चिनाखँ ब्वनाः न्यंकादीगु खः । अथे हे ज्याझ्वलय् कवि सौरभ शाक्यया निपु चिनाखँ संस्थाया दुजः मय्जुपिं मिमला शर्मा व ईश्वरीमैयाँ श्रेष्ठया चिनाखँ रजनी मिलां न्यंकादीगु खः ।

ज्याझ्वलय् पाठ याःगु चिनाखँया कविलिसें समालोचक नापं नेपालभाषा एकेदेमिया सदस्य सचिव डा. पुष्पराज राजकर्णिकारं समालोचना यानादीगु खः ।

निगू ब्वय् न्ह्याःगु ज्याझ्वःया न्हापांगु ब्वया काव्य वाचन संस्थाया छ्याञ्जे रजनी मिलां न्ह्याकादीगु खःसा निगूगु सत्रया ज्याझ्वः विशिष्ट पाहांकथं झायादीम्ह कवयित्री साय्मिलिसे नायः नायः डा. तुलाधरं संवाद ज्याझ्वःकथं न्ह्याकादीगु खः । निगूगु सत्रया संवाद ज्याझ्वः विशिष्ट पाहां साय्मिया काव्यिक जीवन, वय्कःया कृति, काव्य शिल्प व शैलीयात कयाः जूगु खः ।