डा. बज्राचार्यया कृति व दृष्टि विमोचित

येँ– प्रा.डा. चन्द्रमान बज्राचार्यया समालोचनात्मक सफू ‘कृति व दृष्टि’ थौं विमोचन जूगु दु । लहना मिडियाया ग्वसालय् किपुलिइ छगू ज्याझ्वःया दथुइ किपू नगरपालिकाया मेयर रमेश महर्जनं विमोचन यानादीगु खः ।

ज्याझ्वलय् न्ववानादिसें मू पाहाँ मेयर महर्जनं साहित्यया जक मखु, मुक्कं नेवाः ख्यःया समालोचना जुइमाःगु बिचाः तयादिल । नेपालभाषा एकेदमि लगायत नेपालभाषा मंकाः खलःया तकं समाचोलना यानाः नेवाः अभियानयात धिसिलाकेमाःगु खँय् मेयर महर्जनं बः बियादिल । समभाव तयाः याइगु आलोचनां मुक्कं नेवाः ख्यःयात विकास यायेफइगु वय्कःया धापू खः ।

अथे हे नेवाः न्ह्यलुवाः लिसें उपन्यासकार मल्ल के. सुन्दरं नेवाः साहित्ययात च्वन्ह्याका यंकेत सकलें जायेमाः धयादिल । नेवाः साहित्य ख्यलय् थीथी सिरपाः दुगु व थीथी सफुलिं सिरपाः नं त्याकाच्वनीगु परिस्थिती दुने सिरपाः त्याकेबहःगु सफू गुलि दु धइगु समीक्षा नं यायेमाःगु बिचाः उपन्यासकार मल्लं तयादिल ।

विमोचित सफू ‘कृति व दृष्टि’या च्वमि प्रा.डा.चन्द्रमान वज्राचार्यं उपन्यास विधाय् नुगः क्वसाःपिं, उपन्यास च्वइपिनिगु नितिं थुगु सफुतिं मार्गदर्शनया ज्या यायेफु धयादिल । सफूया पिकाकः अर्विन्द्रमान सिंहं नेपालभाषा ब्वनीपिं विद्यार्थीपिनिगु नितिं अध्ययन यायेत सामग्री अःपुक दइगु लकस दयेकेत छपलाः कथं सफू पिकयागु खँ धयादिल । अथे हे, प्रा. प्रेमशान्ति तुलाधर, नेपालभाषा एकेदमिया भाइस चान्सलर यज्ञरत्न धाख्वालं नं नेवाः साहित्य ख्यः व थौं विमोचित सफूयात कयाः दुवालादीगु खः । लहना मिडियाया नायः नृपेन्द्रलाल श्रेष्ठया सभापतित्वय् जूगु ज्याझ्वलय् लहना मिडियाया व्यवस्थापक सुरेन्द्रभक्त श्रेष्ठं लसकुस यानादीगु खः ।