चाबहिली दिप दयेकेथाय् ज्वंम्हेसित त्वःतल
येँ -चाबहिली च्वंगु शाक्यतय् दीप दयेकेगु झ्वलय् जूगु ल्वापुइ लानाः मुद्दा फयाच्वंम्ह सरोज श्रेष्ठयात म्हीग अदालतं निर्दोष साबित याःगु दु । वंगु २०७७ असोज २८ गते येँ महानगरपालिकाया आर्थिक ग्वाहालिं अन जुयाच्वंगु दीप दयेकेगु ज्याय् उगु थासय् लिपा च्वं वःम्ह वासिन्दा मिलन जोशीं पंगः थनेवं ल्वापु जूगु खः ।
उगु कचमच स्वःवंम्ह सरोज श्रेष्ठयात मिलन जोशीं अप्पां कयेकेत्यंगु खःसा श्रेष्ठं थः बचे जुइत जोशीयात घ्वाना छ्वःबलय् दयाः जोशी घाःपाः जूगु खः । उकियात हे आधार दयेकाः जोशीं श्रेष्ठ विरुद्ध ज्यान मुद्दा तःगु खः ।
श्रेष्ठ विरुद्ध ज्यान मुद्दा लायेवं प्रहरीं छानबिन याःगु खःसा प्रहरीया प्रतिवेदन व अदालतय् जूगु बहस लिपा श्रेष्ठयात १ लाख तका धरौती कयाः त्वःतूगु खः । बहसय् अधिवक्ता जितेन्द्र वज्राचार्यपिंसं श्रेष्ठ स्वनिगःया स्थानीय मखुसें भोजपुरय् जन्मे जूगु खःसा दीपनाप वयागु छुं स्वापू मदुगु तर्क तयादीगु खः ।
उगु दिप शाक्यतय्गु निजी जूगुलिं अभियुक्त हे मखुम्हेसित द्वपं बीगु गलत खः धकाः तःगु तर्कया आधारय् श्रेष्ठयात त्वःतूगु खँ धाःगु दु । उकथं हे प्रत्यक्षदर्शी धाःम्ह मनुखं नं थःके उगु घटना बारे जानकारी मदुगु बयान अदालतय् बिउगु खः । श्रेष्ठया रिहा लिपा आः सम्पदा व संस्कृतिया निंतिं आन्दोलन यानाच्वंपिंत हःपाः जूवंगु खँ धाःगु दु ।
चाबहीया उगु दिपया जःखः लिपा जग्गा न्यानाः पिनेयापिं मनूतय्सं छेँ दनाः च्वं वयेवं आः स्थानीय मनूतय्त सी उइ तकं मबियाच्वंगु खः । न्ह्याबलें सी उइ हइबलय् अन पंगः थनाः प्रहरी हे सःते मालीगु अवस्था जुइगु खः । आः दिपया सम्बन्धित गुथियारतय्सं अन बांलाक निर्माण ज्या हे यानाच्वंगु दु ।
LEAVE YOUR COMMENTS