मिस नेवाः आइकन जुइगु

येँ – रेक्स फेशन होम्सया ग्वसालय् ‘मिस नेवाः आइकन–२०१८’ जुइगु जूगु दु । संस्थां आः नकतिनि छगू पत्रकार सम्मेलन यासें थ्व हे वइगु चैत १० गते उगु ज्याझ्वः यायेत्यनागु जानकारी बिउगु खः । रेक्स फेसनया प्रबन्ध निर्देशक खगेश रंजितं नेवाः मिसातय्गु नेतृत्व विकास नापं इमिके सुलाच्वंगु प्रतिभायात न्ह्यःने हयेगु ल्याखं उगु ज्याझ्वः यायेत्यनागु जानकारी बियादिल । कासाय् उपाधि विजेतायात स्वीद्वः तका दां लिसें ७ तोलाया वहया ताज सिरपाः बीगु नापं निःशुल्क एअर होस्टेजया तालिम नं उपलब्ध याकेगु वय्कलं कनादिल ।

थ्व बाहेकं मुख्य उपाधि विजेतायात जुम्बा, जीम, फिजिकल फिटनेसया तालिम नं अवसर दइगु पत्रकार सम्मेलनय् जानकारी बिउगु दु । अथे हे फस्ट रनरअपयात नीद्वः तकालिसें प्यतोलाया वहया ताज व सेकेन्ड रनरअपयात झिद्वः तकालिसें स्वतोलाया वहया ताज बीगु वय्कलं पत्रकार सम्मेलनय् जानकारी बियादीगु दु । थ्व बाहेकं मेमेगु थीथी टाइटल विजेतायात न्याद्वः तका सिरपाः बीगु जूगु दु ।रेक्स फेसन होम्सया प्रमुख कार्यकारी अधिकृत रेक्स रंजितं मुख्य प्रतिस्पर्धाय् अप्वलय् स्वीम्हेसित तक प्रतिस्पर्धा याकेगु व इमिगु हे दथुइ मिस नेवाः आइकन–२०१८ ल्ययेगु जानकारी बियादिल ।

कासाय् एसइइ उत्तीर्ण १६ निसें २४ दँ तकयापिंसं ब्वति काये फइगु नं जानकारी बिउगु खः । स्वनिगलं पिनेयापिंत नं सहभागि याकेगु ग्वसाः दुगु जानकारी बिसें इमिगु निंतिं बछि खर्च ग्वसाः खलकं बीगु जूगु दु । संस्थाया सल्लाहकार अनुपसिंह सुवालं नं नवानादीगु ज्याझ्वः ह्याउँनिभाः पुचःया सहकार्यय् जुइत्यंगु खः । संस्थाया ग्वसालय् जुइत्यंगु थ्व निगूगु संस्करणया ज्याझ्वः खः ।