ने. सं. ११४६ बछलागा षष्ठी -

छगः देगः २१ गू पुस्ता पुजारी

गुगुं नं देगलय् नीछगू पुस्तातक मूल पुजारी जुया वयाच्वंगु खँ न्यनेबलय् न्यने मात्रं अजू चायेफु, तर गोरखाया धार्मिक रुपं अतिकं नांजाःगु मनकामना द्यःयाथाय् छगू हे परिवारया नीछगूगु पुस्तां मूल पुजारीया रुपय आतक नं पुजा यायेगु ज्या याना वयाच्वंगु दु । देगःया मूल पुजारी इन्सानबहादुर थापामगरं थः नीछगूगु पुस्ताया रुपय् मगः पुजारी जुयाच्वनागु धयादिल ।

वय्कः धापूकथं जुजु राम शाहया लानीया नामं मनकामना देगः जूगु खः । राजपरिवारय् सुसाःकुसाः याइम्ह रुपय् च्वनाच्वंम्ह लखन थापामगरया पालंनिसें उगु देगय् इन्सानया पुस्तां मुख्य पुजारीया रुपय ज्या याना वयाच्वंगु खः । वय्कलं धयादिल, ‘थुकिया स्थापनाकालंनिसें हे मगः समुदाय मूल पुजारी जुया वयाच्वंगु नीछगूगु पुस्ता थ्यन ।

जिमि अबु लोकबहादुर व बाज्या प्रेमबहादुर नं थनया हे पुजारी खः ।’ लखन थापामगर राजपरिवारया सुसारे जुयाच्वंगु इलय् जुजुया मृत्यु लिपा रानी सति वनेगु इलय् वय्कःयात जि छंत हाकनं नं जिगु सेवा यायेगु मौका बी धकाः सति वंगु व लिपा बुँइ चाः म्हुयाच्वंगु इलय् ल्वहं लुया वयेवं उकियात देगः स्थापना यानाः पुजा यायेगु यानाहःगु वय्कलं धयादिल ।

आः मनकामना देगलय् उगु हे वंशजया तःधिकःम्ह कायं मूल पुजारीया नेतृत्व कःघाना वयाच्वंगु दु । थम्हं २०२६ य् १० दँ दुगु इलंनिसें पुजारीया रुपय् ज्या याना वयाच्वनागुलिइ वयां १४ दँ लिपा मूल पुजारीया भूमिका म्हिता वयाच्वनागु इन्सानं कनादिल । ककां अबुया शेष लिपा थः मूल पुजारी जुइ दयेमाःगु धासें सर्वोच्चय् रिट दायर याःसां नं थःगु हे पक्षय् फैसला जुइवं थम्हं मूल पुजारीया रुपय् २०४० सालंनिसें ज्या याना वयाच्वनागु व थः तःधिकःम्ह काय निसानं आः पुजारीया रुपय् ज्या सयेकाच्वंगु वय्कलं धयादिल ।

सन्तानय् तःधिकःम्ह काय मदयाः म्ह्याय् दत धाःसा किजायात मूल पुजारीया जिम्मेवारी वनीगु इन्सानया धापू दु । देगलय् मूल पुजारीलिसें न्याम्ह पुजारीं ज्या याना वयाच्वंगु दु । सहीद लखन गाउँपालिका वडा नं. २ लय् लाःगु उगु देगः स्थापनाकालंनिसें हे पुजारीया रुपय् मगः समुदाययालिसें हरेक पर्वय् जुइगु पुजाय् येँय्निसें तान्त्रिक गुरुजुपिं तकं वयेगु यानाच्वंगु दु ।

थौंकन्हय् देगलय् दुपिं पुजारीमध्ये छम्ह ब्रम्हु समुदायया व मेपिं पुजारी मगः समुदायया हे छेँया परिवारया दुजःपिं दु । अन छाइगु भेटी (ध्यबां) हे दक्वं खर्च गाके माःगु इन्सानं कनादिल । मनकामना देवीया शक्ति धाथें अजू चायापुगु चर्चा यासें वय्कलं देशय् वःगु महत्वपूर्ण घटनाय् छुं गुगुं रुपय् न्ह्यव हे संकेत मिले जुइगु व दरवार हत्याकाण्ड, विनाशकारी तःभुखाय् थेंज्याःगु घटनाय् थःत न्हापा हे संकेत दुगु जानकारी बियादिल ।

मनकामनाय् केबुलकार दयेकीगु विषयय् नं न्हापा हे संकेत वःगु इन्सानया धापू दु । मूल पुजारी मगःयाकथं इमिसं नियमित रुपं नीसी यानाः पुजाय् च्वनेमाःगु व छेँ–परिवारय् दुःखं च्वनेमालीबलय् थःथितिपिंसं थ्व ज्या स्वयेगु यानाच्वंगु नापं ततःधंगु पुजाय् अय्लाः मदयेकं मगाःगु जूगुलिं प्रसादया रुपय् नयेगु याःसां नं मेमेगु पुजाय् धाःसा प्रयोग यायेगु याना मच्वनागु वय्कलं धयादिल ।

न्हापा न्हापाया तुलनाय् आः भक्तजनतय् चाप अप्वया वनाच्वंगु दु । मंसिर, पुस, माघ व फागुनया शनिवाः, सोमवाः, मंगलवाः व शुक्रवाः भक्तजनतय् तसकं हुलमुल जुइगुलिइ आः न्ह्यागु दिनय् नं भक्तजन म्वःम्वः दयाच्वंगु मूल पुजारी इन्सानं कनादिल ।