बीबीसीया प्रभावशाली व्यक्तित्वय् रुक्साना कपाली

येँ (नेपालभाषा टाइम्स)2- बीबीसीं सार्वजनिक याःगु विश्वया १०० म्ह प्रभावशाली मिसापिनि धलखय् नेवाः अभियन्ता रुक्साना कपाली नं दुथ्याःगु दु । वय्कःया नेपाःया पारलैंगिक मिसाया रुपय् उगु धलखय् दुथ्याकूगु खः ।

मय्जु कपालीं त्रिभुवन विश्वविद्यालयय् थःगु नां व लिंग हिलाः न्हूगु म्हसीकाया माग याःबलय् बीत अस्वीकार याःगु खःसा उकिया विरुद्ध अदालतय् कानुनी लडाइँ ल्वानादीगु खः । अथे हे परम्परांनिसें च्वना वयाच्वंगु छेँपाखें पूर्जा मदु धइगु आधारय् पितिना हःगु विरुद्ध नं वय्कलं कानुनी लडाईं ल्वानादीगु खः । नेवाः समुदायय् कपाली (जोगी) समुदाय गुगु छेँय् च्वनीगु खः उकियात सःतः खः धासें पूर्जा मबीगु चलन दु ।

थज्याःगु थीथी कानुनी लडाईं ल्वाये माःगु कारणं वय्कलं उच्चशिक्षाय् कानुन हे विषय कयाः ब्वनादीगु खः । वय्कः आः कानुन विषयय् अध्ययन याना च्वनादीगु दु ।
कपाली नेपालभाषाया च्वमि लिसें नेवाः आन्दोलनया छम्ह अभियन्ता नं खः । सडक विस्तार, सम्पदा संरक्षण, भाषा अभियान आदि थेंज्याःगु थीथी नेवाः मुद्दाया आन्दोलनय् नं वय्कः सहभागी जुइगु यानादी ।