क्रोधकला शिरोमणि कालु कुम्हाःया ९४ दँ बुन्हि

यल (नेपालभाषा टाइम्स) – क्रोधकला शिरोमणि प्राज्ञ कालु कुम्हाः ९४ दँय् क्यंगु खः । क्रोधकला शिरोमणि प्राज्ञ कालु कुम्हाः ९४ दँ बुन्हि वय्कःया छेँय् छगू विशेष ज्याझ्वः यासें हंगु दु ।

क्रोधकला शिरोमणि फाउण्डेसनया ग्वसालय् थनया हात्तिवनस्थित निवासय् जूगु ज्याझ्वलय् थीथी व्यक्ति व संघसंस्थापाखें वय्कःया भिंतुनेगु ज्या जूगु खः । वय्कःया ९४ दँ बुन्हिया लसताय् जूगु ज्याझ्वलय् यल महानगरपालिकाया उपप्रमुख मञ्जली शाक्य वज्राचार्य, पाटन दरवार संग्रहालय, लोक साहित्य परिषद्, यल महानगरपालिकाया वडा ज्याकूलगायत थीथी झिंच्यागू संघसंस्थापाखें वय्कःयात भिंतुना देछाःगु खः ।

फाउण्डेसनया नायः राकेश अवालें छम्ह नेवाः कुम्हाःया कायमचां त्वाः, समाज व देशय् जक मखसे १९७३ य अन्तर्राष्ट्रिय ख्यलय् तकं म्हसीका बीत ताःलाःगु खँ कनादीगु दु ।

उगु इलय् परम्परागत धातु मूर्तिकलाया ज्वःमदुम्ह सिद्धहस्त मूर्धन्य कलाकार प्राज्ञ कुम्हाःया बुन्हिया लसताय् वय्कःया सुस्वास्थ्य, ताःआयुया कामना यासे येँया ज्याथाया छगू पुचलं नामसंगीति पाठ नं याःगु खः । उगु नामसंगीत पाठ नं प्राज्ञ कुम्हाःया हे इच्छाकथं याकागु वय्कःया काय अवालें कनादिल ।

वय्‌कलं थःगु परम्परागत धातु मूर्तिकलाया माध्यमं विदेशय् तकं नेयाः कलायात म्हसीका बियादीगु दु । ज्याथःगु उमेरया कारणं उखेंथुखें जुइत थाकुसां वय्कलं थःगु बौद्धिक क्षमता नापनापं थःगु सीप, ज्ञानयात थौंतक नं मदिक्क न्ह्याकाच्वनादीगु दु ।