विद्युत बक्यौताबारे छानविन यायेत संसदीय उपसमिति गठन

येँ – नेपाल विद्युत प्राधिकरणं थीथी उद्योगपाखें म्हय् ल्यंदुगु अर्बौं तका म्हयेगु सम्बन्धय् सुझाव बीत संसदया लेखा समितिं छगू छानविन उपसमिति दयेकूगु खः । थीथी उद्योगतय्सं छ्यःगु मतया डेडिकेटेड व ट्रंक लाइनया ध्यबा म्हयेगु बारे छानविन यायेत कंग्रेस सांसद डा. मीनेन्द्र रिजालया संयोजकत्वय् सूर्यपाठक, तेजुलाल चौधरी, पार्वती विशंखे व प्रदीप यादव दुजः दुगु छानविन उपसमिति गठन याःगु खः ।

प्राधिकरणं टं«क सेवा व डेडिकेटेड लाइन कयातःपिं उद्योगपाखें ९ अर्ब तका म्हये ल्यंदनि । थ्व विषययात कयाः लेखा समितिं विद्युत प्राधिकरणया पदाधिकारी व उद्योगीतय् लिसे सहलह यायेधुंकूगु दु । न्हापा लोडसेडिङया इलय् मत मस्याकेगु निंतिं विशेष सेवा कथं उद्योगतय्सं डेडिकेटेड व ट्रंक लाइन कयातःगु खः ।

तर थुकिया शुल्क इलय् हे म्हय् मफयेवं आःतकया दुने गुंगू अर्ब ध्यबा उठे याये ल्यं दनि । मुख्ययात भैरहवा व वीरगंज करिडोरया सिमेन्ट उद्योग लिसें थीथी ततःधंगु उद्योगतय्सं थ्व सेवा कयातःगु खः । सामान्य ग्राहकतय्सं प्रति युनिट ९ तका पुलेमाःगु इलय् डेडिकेटेड व टं«कलाइनय् धाःसा प्रतियुनिट २२ तका पुलेमाःगु व्यवस्था यानातःगु खः ।

थुगु लाइन कयातःपिं उद्योगीतय्सं प्राधिकरणं मिले मजुइगु महसुल लगे याःगु धासें पुलेत अस्वीकार याना वयाच्वंगु दु । आः गठन याःगु उपसमितिं डेडिकेटेड व ट्रंकलाइनया ग्राहकतय्सं शुल्क पूगु दु कि मदु, उकिं राष्ट्रयात गज्याःगु घाटा जुल, बक्यौत छुकथं म्हयेगु धयागु विषयय् सुझाव सहित लछि दुने प्रतिवेदन बुझे याइ ।

सम्बन्धित बुखँ

LEAVE YOUR COMMENTS