रास्वपाया विधान संशोधन : सभापतियात प्रधानमन्त्री चीकेगु अधिकार
येँ (नेपालभाषा टाइम्स) – जेनजी आन्दोलन लिपा जूगु निर्वाचनय् घन्टी न्यायेकाः बहुमत हयेत ताःलाःगु राष्ट्रिय स्वतन्त्र पार्टीपाखें प्रधानमन्त्री जूम्ह बालेन साहयात पार्टी सभापति रवि लामिछानें आः वयाः गःपतय् तरवार घाकाबिउगु दु । लामिछानें पार्टीया विधान संशोधन यानाः प्रधानमन्त्रीयात तकं चीकेफइगु अधिकार सभापतियात दइगु व्यवस्था यानाबीवं सभापतिया तरवार प्रधानमन्त्रीया गःपतय् झुण्डे जूवःगु खँ राजनीतिक विश्लेषकतय्सं धाःगु दु ।
नकतिनि सार्वजनिक जूगु रास्वपाया संशोधित विधानय् सभापतियात संसदीय दलया नेतायात तकं चीकेगु अधिकार बियातःगु खः । विधानय् सभापतिया निर्देशन पालना मयात धाःसा पार्टीया संसदीय दलया नेतायात स्वतः पदमुक्त यायेदइगु प्रावधान तयातःगु दु । थ्व धयागु तप्यंक प्रधानमन्त्रीयात नं चीकेफु धाःगु खः । संविधान कथं प्रधानमन्त्री जुइत दलया संसदीय नेता जुइमाः । संसदीय नेता मजुल धाःसा प्रधानमन्त्री नं जुइदइमखु ।
संशोधित विधानया दफा ११ (क)य् पार्टी सभापतिया काम कर्तव्य व अधिकार न्ह्यथनातःगु दु । उकी पार्टी सभापति संगठनया सर्वोच्च कार्यकारी प्रमुख, वैचारिक मार्गनिर्देशक व पार्टी एकताया प्रतिक जुइ धयातःगु दु । थुकी व्याख्या यानाः धयातःगु दु, ‘पार्टी सभापति संसदीय दलया नेता मजूगु अवस्थाय् संसदय् पार्टीया आधिकारिक नीति, सिद्धान्त, निर्णय व दृष्टिकोणया प्रभावकारी प्रतिनिधित्व व कार्यान्वयनया निंतिं संसदीय दलयात आवश्यक नीतिगत मार्गनिर्देशन प्रदान यायेगु । थज्याःगु मार्गनिर्देशन पालना यायेगु संसदीय दल, संसदीय दलया नेता व सदस्यतय् अनिवार्य कर्तव्य जुइ ।’
थ्वहे दफायात स्वानाः दफा ६८ इ संसदीय दलया नेतायात पदमुक्त यायेगु व प्रत्याह्वान सम्बन्धी व्यवस्था न्ह्यथनातःगु दु । थुकिया उपदफा १ य् ‘क्वय् न्ह्यथनागु छुं नं अवस्थाय् दलया नेताया पद स्वतः रिक्त जूगु माने जुइ’ धकाः न्ह्यथनातःगु दुसा उपदफा १ (ङ)य् थ्व विधानया ११ (क)या अ ३ कथं पार्टी सभापतिं बिउगु नीतिगत निर्देशन पालना मयात धाःसा’ धकाः न्ह्यथनातःगु दु ।
थ्व व्यवस्थां सभापतिया नीतिगत निर्देशन पालना मयात धाःसा संसदीय दलया नेताया पद स्वतः रिक्त जुइगु खँ धाःगु दु । थ्व व्यवस्था कथं सभापतिं बिउगु निर्देशन पालना मयात धाःसा संसदीय दलया नेतायात बर्खास्त यायेफइगु जूगु दु ।
थ्व विधान रास्वपाया न्हापांगु महाधिवेशनं संशोधन याःगु खःसा सार्वजनिक चर्चा मवःनिगु खः । म्हिगः रास्वपाया पुलांम्ह महामन्त्री डा. मुकुल ढकालं सामाजिक सञ्जालय् थ्व खँ तयाबिइवं चर्चाय् वःगु खः ।
संविधानविद्तय् कथं संविधानया धारा ७१ (१)य् प्रधानमन्त्री पार्टीया संसदीय दलया नेता जुइ हे माः धयागु व्यवस्था यानातःगुलिं यदि पार्टीं संसदीय दलया नेता चीकल धाःसा प्रधानमन्त्री पाखें नं पदमुक्त जुइगु अवस्था वइगु खँ धाःगु दु । पार्टीं संसदीय दलया नेता हिउगु सुचं राष्ट्रपति कार्यालययात बिल धाःसा न्हूगु सरकार गठन यायेगु प्रक्रिया न्ह्याःवनीगु संवैधानिक व्यवस्था दु ।
LEAVE YOUR COMMENTS