येँ महानगर पूर्ण खोप सुनिश्चित घोषणा

येँ (नेपालभाषा टाइम्स) – देय्‌या ज्याथःगु महानगरपालिका येँ महानगरपालिकायात पूर्ण खोप सुनिश्चित पालिका घोषणा याःगु दु । थनया राष्ट्रिय सभागृहय् वंगु शुक्रवाः जूगु छगू औपचारिक ज्याझ्वः दथुइ येँ महानगरपालिकायात पूर्ण खोप सुनिश्चित पालिका घोषणा याःगु खः ।

ज्याझ्वलय् येँ जिल्ला खोप समन्वय समितिया सदस्य सचिव सागरप्रसाद घिमिरें येँ महानगरपालिकाया कार्यवाहक प्रमुख सुनिता डंगोलयात पूर्ण खोप सुनिश्चित जूगु दसिपौ लःल्हानादीगु खः । लिसें उगु हे ज्याझ्वलय् कार्यवाहक प्रमुख डंगोलं महानगरया दक्वं वडा ज्याकूयात नं पूर्ण खोप सुनिश्चित जूगु दसिपौ लःल्हानादीगु खः ।

उगु इलय् येँ महानगरपालिकाया कार्यवाहक प्रमुख डंगोलं खोप मस्तय्गु जन्मसिद्ध अधिकार जूसां इमिसं थःगु अधिकारया बारे नवाये मफइगु जूगुलिं मस्तय्त इमि अभिभावक व सरकारं ग्वाहालि यायेमाः धयादिल ।

बालमृत्यु दर क्वपालेगु व व्यक्तियात जुइ फइगु अपांगता म्हो यायेगु खोप छगू प्रभावकारी माध्यम खः धासें वय्कलं धयादिल, ‘मस्तय्त जुइफुगु जोखिमपाखें बचे याये सक्रिय स्वास्थ्यकर्मी, मिसा स्वास्थ्य स्वयमसेविकाया योगदान च्वछायेबहजू । हरेक मस्तय्त खोपपाखें बञ्चित जुइके मबीत सकलें अभिभावकपिं सं थःगु थासं दायित्व निर्वाह यायेत नं इनाप यानाच्वना ।’

उगु इलय् पूर्ण खोपया निंतिं विशेष योगदान बियादीम्ह स्वास्थ्य विभागया फोकल पर्सन मैयाँ सैंजूयात विशेष हनेज्या नं याःगु खः ।