आरक्षण विरोधी फैसलाया विरोध

येँ -लिउने लानाच्वंगु जाति व समुदाययात राज्यं बियातःगु आरक्षण व्यवस्था खारेज यानाः आः वर्गीय आधारय् आरक्षण बीगु व्यवस्था जुइमाः धकाः सर्वोच्च अदालतं याःगु फैसलायात देय्या आदिवासी जनजाति न्ह्यलुवातय्सं विरोध याःगु दु ।

नेवाःतय् राष्ट्रिय संगठन नेवाः देय् दबूया नायः नरेश ताम्रकारं लिउने लाना–च्वंगु समुदाययात न्ह्यःने हयेगु लागिं सकारात्मक विभेदया रुपय् यानातःगु थ्व व्यवस्थायात खारेज यायेगु सर्वोच्चया फैसलां लिउने लानाच्वंगु समुदाययात मार लाकीगु बिचाः तयादीगु दु ।

‘नेपालभाषा टाइम्स’ लिसे खँ ल्हासें वय्कलं धयादिल, ‘थ्व फैसला कार्यान्वयन जुल धाःसा लिउने लानाच्वंगु समुदाययात न्ह्यःने हयेगु ज्याय् हानं लिच्वः लाइगु खतरा ब्वलंगु दु ।’

अथे हे आदिवासी जनजाति महा–संघया पुलांम्ह नायः लिसें जनजाति बुद्धिजीवी डा. ओम गुरुङं धयादीगु दु, ‘सर्वोच्चया थ्व फैसलां क्यना बिउगु दु कि सर्वोच्चं नेपाःया समाज गज्याःगु खः धकाः हे म्हमसिउनि । नेपाःया समाजय् जातीय विभेदं यानाः समाज लिउने लानाच्वंगु दु । जातीय विभेदं यानाः लिउने लानाच्वंपिंत वर्गीय रुपया समाधानं उद्धार याये फइ मखु ।’

डा. गुरुङं सर्वोच्चया थ्व फैसलां देशय् हानं छगू हे जक समुदायया बर्चस्व कायम यायेत स्वःगु बिचाः ‘नेपालभाषा टाइम्स’ यात प्वंकादीगु दु । लिसें सर्वोच्चया फैसलायात स्वीकार याये फइ मखु धासें थुकियात खारेज यायेमाःगु माग नं यानादीगु दु ।

सर्वोच्च अदालतया थ्व फैसलायात कयाः आदिवासी जनजाति, दलित व मधेसी समुदायं कडा रुपं विरोध यायेगु तयारी यानाच्वंगु खँ सीदुगु दु । तर सर्वोच्चं याःगु थ्व फैसलायात कयाः संविधानसभापाखें संविधान च्वयेगु ज्या याःपिं छुं नं राजनीतिक पार्टी व राजनीतिक नेतातय्सं धाःसा छुं प्रतिक्रिया बिउगु मदुनि ।

सम्बन्धित बुखँ

LEAVE YOUR COMMENTS