बाखं दबूया न्हूगु ल्याः पिदन

येँ (नेपालभाषा टाइम्स) – नेपालभाषा साहित्यय् बाखं विधायात च्वन्ह्याकेगु तातुनाः नीस्वनातःगु बाखं दबूपाखें ‘बाखं दबू’या १३ गूगु ल्याः पिथंगु दु । दबूया संस्थापक दुजःलिसें बाखं च्वमि लोचनतारा तुलाधरया सभापतित्वय् जूगु छगू ज्याझ्वःया दथुइ नेपालभाषा केन्द्रीय विभागया उपप्राध्यापक शरद कसाः व राजितबहादुर श्रेष्ठं मंकाःकथं बाखं दबूया न्हूगु ल्याःया पितब्वज्या यानादीगु खः ।

उगु इलय् बाखं दबूया न्हूगु ल्याःयात कयाः समीक्षात्मक रुपं अन्तक्र्रिया नं जूगु खः । सभापति तुलाधरं न्हू ल्याखय् दुथ्याःगु न्यापु बाखंया समीक्षा यानादिसें बाखं च्वयेगुलिइ प्रारम्भिक चरणया सिकाइपाखें थःत परिमार्जित याा यंकेमाःगु खँय् बः बियादिल ।

अथे हे मेम्ह बाखं च्वमि डा. रीना तुलाध बनियां नं न्यापु बाखंया समीक्षा यानादिसें बाखं च्वयेबलय् पात्रया म्हसीका पिज्वइकतथं तर, विवरण म्हो यानाः च्वयेमाःगु खँय् बः बियादिल ।

बाखं च्वमिलिसें उपप्राध्यापक कसां थःगु भावना साहित्यया माध्यमं अभिव्यक्त यायेबलय् सैद्धान्तिक पक्षयात नं कःघानाः च्वयेगु यात धाःसा बुलुहुं सुधार जुया वइगु खँय् बः बियादिल । ज्याझ्वलय् दिव्या वज्राचार्य, बद्री वेदना, मचाकाजी महर्जन, सविता महर्जनं नं थःथःगु नुगःखँ तयादीगु खः ।

पीच्याम्ह साहित्यकारया बाखं दुथ्यानाच्वंगु बाखं दबूया न्हूगु ल्याःया सम्पादन पौभाः साय्मिं यानादीगु खः ।