मंसिर ४ गते संघ व प्रदेश निगुलिं संसदया निर्वाचन घोषणा

येँ (नेपालभाषा टाइम्स)÷सरकारं थ्वहे वइगु मंसिर ४ गते प्रतिनिधिसभा व प्रदेशसभाया चुनाव यायेगु घोषणा याःगु दु । म्हिगः सिंहदरबारय् च्वंगु मन्त्रिपरिषद् बैठकं थ्व निर्वाचन तिथि क्वःछिउगु खः । थ्व कथं आः वइगु १०६ न्हु लिपा निर्वाचन जुइगु निश्चित जूगु दु ।

थ्वहे झ्वलय् निर्वाचन आयोगया प्रमुख निर्वाचन आयुक्त दिनेश थपलियां सरकारं घोषणा याःगु तिथिइ निर्वाचन यायेत आयोग तयार दुगु खँ धयादीगु दु । वय्कलं कानुन कथं निर्वाचन यायेत १२० न्हु माःगु खःसां आयोगया हे परामर्शय् सरकारं तिथि क्वःछिउगुलिं निर्वाचनया नितिं आयोग तयार दुगु खँ धयादिल । आयोगं न्हापांनिसें आन्तरिक तयारी यानाच्वनागुलिं आः उकियात औपचारिकता बीगु नं धयादिल ।

अथे हे प्रमुख निर्वाचन आयुक्त थपलियां प्रतिनिधिसभा व प्रदेशसभाया म्याद उम्मेदवारी दर्ता शुरु जुइवं क्वचाइगु खँ धयादीगु दु । थौंकन्हय् प्रतिनिधिसभा व प्रदेशसभाया दुजःपिनि म्याद गबले तक खः धइगु न्ह्यसः ब्वलनाच्वंगु धासें आः उकिया नितिं कानुनी ब्याख्या यानाः हे आयोगं सार्वजनिक जानकारी बीगु खँ नं वय्कलं कनादिल ।

म्हिगः पत्रकार सम्मेलनय् न्ववासें वय्कलं मोहनि क्वचायेवं उम्मेदवारी दर्ता यायेमाःगु कथं तिथि क्वःछीमाःगु व उम्मेदवारी बीधुंकाः उमिगु पद स्वतः मदइगु कथं कानुनसम्मत ढंगं व्याख्या यायेगु खँ नं कनादिल ।

प्रदेशसभा व प्रतिनिधिसभाया कार्यकालया ब्याख्या धाःसा आयोगं मयायेगु खँ धासें थपलियां निर्वाचित जूगु तिथिं कार्यकाल न्ह्याइगु व वयां न्यादँ लिपा क्वचाइगु खँ स्पष्ट यानादिल । थ्व ल्याखं आः वइगु मंसिर २१ गते वर्तमान सांसदतय्गु पदावधि समाप्त जुइ धकाः लिखित रुपय् सरकारयात जानकारी याकेधुंकूगु दु ।

उकथं हे आयोगं कन्हय्निसें हे राजनीतिक दल दर्ताया ज्या न्ह्याकीगु जूगु दु । कन्हय्निसें समानुपातिकपाखेया निर्वाचन अधिकृतया ज्याकू चायेकाः ज्या न्ह्याकी । आयोगया कथं समानु– पातिक उम्मेदवारया बन्द सूचीया प्रक्रिया मन्ह्याकुसे प्रत्यक्ष उम्मेदवारया ज्या मन्ह्याइगु जुयाः समानुपातिक उम्मेदवारया ज्या निं न्हापां न्ह्याकेत्यंगु खः ।

सम्बन्धित बुखँ

LEAVE YOUR COMMENTS