क्यानाडाया टोरन्टोय् गृष्मकालीन नेपालभाषा प्रशिक्षण क्वचाल
येँ (नेपालभाषा टाइम्स) – क्यानाडाया टोरन्टोय् न्ह्यानाच्वंगु गृष्मकालीन नेपालभाषा प्रशिक्षण ज्याझ्वः (टोरन्टो नेपालभाषा समर स्कुल) क्वचाःगु दु । जुन १५ तारिख सोमवाःनिसें न्ह्याःगु कक्षा जुन २७ शनिवाः क्वचाःगु खः ।
थुगुसी प्यक्वःखुसी न्ह्याःगु प्रशिक्षणय् नेपाः, क्यानाडालिसें अमेरिका, आयरल्याण्ड, इटाली, जर्मनी, जापान, फ्रान्स, बेलायत, हंगेरी, भारतया यानाः मुक्कं न्यय्न्हय्म्हेसिनं ब्वति काःगु खः । प्रशिक्षणय् नेपाः व नेवाःतय् बारे रुचि तइपिं ब्वँमि, अध्ययेता, अनुसन्धाता, प्राध्यापकतय्सं ब्वति काःगु खः ।
न्हूपिं प्रशिक्षार्थीतय् निंतिं आधुनिक नेपालभाषा निगू एकाइ, पुलांगु नेपालभाषा, न्हूपिं प्रशिक्षार्थीया निंतिं पुलांगु नेपालभाषा उच्च अध्ययन कक्षा, आधुनिक नेपालभाषा न्हूपिं प्रशिक्षार्थीतय् निंतिं व आधुनिक नेपालभाषा साहित्यया उच्च कक्षा व न्हूपिं प्रशिक्षार्थीतय् निंतिं आधुनिक ब्याकरणया प्रशिक्षण बिउगु खः ।
खुन्हुतक न्हिछियंकं ब्वंकेगु ज्या जूगु गृष्मकालीन नेपालभाषा प्रशिक्षणय् टोरन्टो विश्वविद्यालयया प्रोफेसर डा. क्रिस्टोफ इमरिच, डा. बालगोपाल श्रेष्ठ, श्रीलक्ष्मी श्रेष्ठ, गीता मानन्धर व डा. इयान टर्नरं कक्षा कयादीगु खः ।
नेपालभाषा प्रशिक्षण बाहेकं ज्याझ्वःकथं जुन २५ य् प्रा. निर्मलमान तुलाधरं ‘नेपालभाषाया सन्दर्भय् भाषाया राजनीति’ विषयय् नेपालभाषां न्वचु तयादीगु खःसा लिपांगु दिं जुन २७ कुन्हु हार्बर विश्वविद्यालयया पोस्ट डाक्टरल फेलो डा. लुवेन लिउं ‘छगः चैत्यया जीवन ः लिपांगु मल्लकालया नेपालय् निर्माण मर्मत व संरक्षण’ विषयय् अंग्रेजीं न्वचु तयादीगु खः ।
थःगु न्वचु तयादिसें प्रा. तुलाधरं लिच्छवीकालया संस्कृत अभिलेखय् लुया वःगु थाय्बाय्या नांत नेपालभाषां न्ह्यथनातःगु खँ कनादिसें थ्यंमथ्यं १५०० दँ न्ह्यःनिसें नेपालभाषा जनभाषाकथं बोलिचालीया भाय् जुया वयाच्वंगु खँ कनादिल ।
मल्लकालया शुरुनिसें राजकीय संरक्षण प्राप्त जुयाच्वंगु नेपालभाषाय् आपालं अभिलेख, ऐतिहासिक अभिलेखीकरण, सृजनात्मक लेखनय् पुलांगु नेपालभाषाया साहित्यया यक्व विधा चकना वंगु तर, पृथ्वीनारायण शाहं स्वनिगः त्याकेधुंकाःनिसें व अनं लिपा राणाकालय् राज्यं हे थ्व भाषायात क्वत्यलेगु ज्या याःगुलिं नेपालभाषा लिउने लाः वंगु खः धयादिल ।
डा. टर्नरं सहजीकरण याःगु थुगु सत्रय् जूगु न्ह्यसः लिसःया इलय् प्रा. तुलाधरं येँ महानगरपालिकां स्थानीय पाठ्यक्रमया रुपय् विकास यानाः नेपालभाषां अनिवार्य ब्वंकेगु याःगुलिं थुकिया महत्व अझ अप्वया वंगु धासें थःपिनिगु भाय्या निंतिं नेवाःतय्सं अझ आपालं ज्या यायेमानिगु खँ कनादिल ।
डा. लिउं मल्लकालया लिपांगु इलय् सुनां चैत्यत दयेकल, मर्मत यातलिसें थुपिं स्मारक व सम्पदाया संरक्षण गुकथं जुल धइगु बारे थीथी ल्वहंपौया दसियात बः कयाः थःगु न्वचु तयादीगु खः । थःगु न्वचुया झ्वलय् वय्कलं किपूया चिलंच्वय् च्वंगु चैत्यलिक्कं च्वंगु ल्वहंपौतय्गु अध्ययन झ्वलय् लुइकादीगु तथ्यत विश्लेषया यानादीगु खः ।
प्रा.डा. इमरिचं सहजीकरण यानादीगु ज्याझ्वः लिपा जूगु न्ह्यसःलिसः ज्याझ्वलय् वय्कलं थीथी देशं ब्वति कयादीपिं जिज्ञासुपिनिगु जिज्ञासाया लिसः बियादीगु खः ।
थुगु गृष्मकालीन नेपालभाषा प्रशिक्षण ज्याझ्वः क्यानाडाया टोरन्टो विश्वविदालयया बौद्ध धर्म अध्ययन विभागय् दि रोबर्ट एचएनहो फेमिलि फाउण्डेसन फर बुद्धिस्ट स्टडिजया ग्वाहालि प्यदँ न्ह्यःनिसें निःशुल्क न्ह्याका वयाच्वंगु खः ।
LEAVE YOUR COMMENTS