ने. सं. ११४४ कौलाथ्व पारू - नःलास्वनेगु

ख्वनाया रुद्रायणी देगः बजेट अभावं अलपत्र

यल(नेपालभाषा टाइम्स)- यल महानगरपालिका २१ ख्वनाय् च्वंगु रुद्रायणी द्यःया देगः बजेट अभावया कारणं क्वचायेके फयाच्वंगु मदु । २०७२ सालया भुखाचं क्षति जूगु देगः पुनःनिर्माण शुरु जूगु प्यदँ दयेधुंकूगु दु । तर बजेट अभावया कारणं देगः पुनःनिर्माण यायेगु ज्या अलपत्रय् लानाच्वंगु दु ।

यल महानगरपालिकां देगः पुनःनिर्माणया निंतिं छक्वलं बजेट निकासा याना मबिउगुलिं पुनःनिर्माणया ज्या न्ह्याये मफयाच्वंगु रुद्रायाणीदेवी पुनःनिर्माण उपभोक्ता समितिया अध्यक्ष बेखानारायण महर्जनं कनादीगु दु । वि.सं. २०७८ सालय् यल महानगरपालिकां उपभोक्ता समिति गठन यानाः देगः पुनःनिर्माणया ज्या न्ह्याकूगु खः । महानगरपालिकां दँय्दसं देगःया निंतिं बजेट फ्यायेगु याना वयाच्वंगु तर उकथं बजेट धाःसा निकासा याना मबिउगुलिं देगः पुनःनिर्माणया ज्या न्ह्याये मफुगु वय्कलं कनादिल ।

०७२ सालया भुखाचं क्षति जूगु मेमेगु आपालं देगः पुनःनिर्माणया ज्या क्वचायेधुंकूगु तर रुद्रायणी द्यःया देगः धाःसा बजेट निकासा याना मबिउगुलिं हे ज्या न्ह्याये मफुगु वय्कलं जानकारी बियादिल ।

रुद्रायाणीदेवी गुथिया नायः उदयकुमार डंगोल देगः पुनःनिर्माणया ज्याय् ढिलासुस्ती जुयाच्वंगु छता हे जक कारण धइगु बजेट निकासा याना मबिउगुलिं खः धयादिल । देगः पुनःनिर्माणय् आतक प्यंगू करोड स्वयां अप्वः खर्च जुइधुंकूगु व थ्व हे अवस्था जुयाच्वन धाःसा वइगु निदँया दुने नं देः पुनःनिर्माण क्वचायेकेत थाकुइगु वय्कःया धापू दु । देगः पुनःनिर्माणया ज्याय् खने दयाच्वंगु ढिलासुस्तीया कारणं द्यःयात अस्थायी देगः दयेकाः तयातःगु दु । याकनं देगःया दने क्वचायेकाः द्यःयात देगलय् थापना यायेफत धाःसा जात्रा व न्हिथं पुजा यायेत नं अःपुइगु गुथिया दुजः हेराबहादुर डंगोलं कनादिल ।

उगु देगः २०७८ भदौ २३ गते क्षमा पुजा यासें तत्कालीन उर्जा, जलस्रोत व सिँचाइ मन्त्री पम्फा भुसालं शिलान्यास यानादीगु खः ।