बुद्धकृष्णं थुकथं म्ये प्वाःखन

बैशाख २ गते । ई ः न्हिनसिया १२ ताः । न्हिनसिया १२ बजे जूगु इलंनिसें हे मध्यपुर थिमिया बोडेय् मनूतय् हुल बुलुहुं अप्वया वन । स्वस्वखंक हे मध्यपुर थिमि– ८ स्थित बोडेया पाँचो गणेद्यःया दक्षिणपाखे स्वःगु फल्चा जःखःनिसें बोडेन्यंकं हे मनूतय् हुल अप्वया वन । बिस्काः जात्राया झ्वलय् मध्यपुर थिमिइ न्यायेकीगु विश्वप्रसिद्ध म्ये प्वाःखनीगु जात्रा स्वयेगु निंतिं घौपलखं हे इकिधिकि हे सने मछिंक मनूत खचाखच जुल ।

व हे हुलमुलं भचा तापाक प्रतिनिधिसभा सदस्य महेश बस्नेत, प्रदेश नं. ३या प्रदेशसभा सदस्य डा. राजेन्द्रमान श्रेष्ठ, मध्यपुर थिमि नगरपालिकाया प्रमुख मदनसुन्दर श्रेष्ठ जात्रा स्वस्वं किपा कायेगुलिइ व्यस्त जुयादिल । वयां छुं ई लिपा हे पं बाला थानाः छपुचः मनूत लस्करं झ्वःछुनाः वल, अले सकसिगुं ध्यान थःपिंपाखें सालाकाल ।

उकिया नापनापं १० इन्च ताःहाकःगु मुलु ज्वना वःम्ह मनू व वयां छुं ई लिपा हे थःगु म्ये प्वाःखनेत तयार जुयाः बोडेन्यंकंया दक्वं देवीदेवताया देगलय् पुजा यायां ४७ दँ दुम्ह बुद्धकृष्ण बाग श्रेष्ठ थ्यंकः झाल । बोडेया सकल वासिन्दां छगू हे सलं वय्कःया जयजयकार यात ।

पाँचो गणेद्यःया दक्षिणपाखे स्वयाच्वंगु फल्चाय् दयेकातःगु दबुलिइ थहां वने धुंकाः कःमि नाइकेतय्सं प्यखेरं जाकिं पुज्यानाः देवीदेवतायात लुमंकाः धुं, धुपाँय् च्याकेवं वंगु लछि न्ह्यवंनिसें तयार यानाः चिकनय् थुनातःगु १० इन्च मुलुं द्वलंद्वः स्वकुमिपिनिगु उपस्थितिइ इमिगु हे न्ह्यःने श्रेष्ठया म्ये प्वाःखन ।

वयां लिपा वय्कलं सकसितं ज्वज्वलपा यानाः अभिवादन यायेवं चन्द्राकारया भ्वाँय् अर्थात महाद्वीप कुबियाः उगु थासं पिहां वल । महाद्वीप कुबियाः करिब पौने एक घन्टातक बोडेन्यंकंया त्वाःत्वालय् चाःहिलाः लिपा हाकनं भांगु त्वालय् थ्यंकाः महालक्ष्मी देगलय् दुहां वनेवं म्ये प्वाःखंगु मुलु लिकयाः देगलय् ताना बीवं मध्यपुर थिमिया नांजाःगु म्ये प्वाः खनेगु जात्रा क्वचाल ।

चैतया लिपांगु न्हि बोडेया महालक्ष्मी द्यःयाथाय् यःसिं थनेवं म्ये प्वाः खनीम्ह श्रेष्ठ निराहार व्रत च्वनाः बैशाख २ गतेकुन्हु म्ये प्वाःखने धुंकाः घाः जूगु थासय् महालक्ष्मी देगःया चा कयाः तयाः नासःद्यःया पुजा यानादीगु खः । म्ये प्वाःखनाः प्वाः गंगु थासय् अर्थात घाः जूथाय् महालक्ष्मी द्यःया चाः तल धाःसा याकनं लनीगु व उकी मेगु छुं नं वासः तये म्वाःगु श्रेष्ठं कनादिल ।

‘परम्परांनिसें न्ह्याना वयाच्वंगु म्ये प्वाः खनेगु जात्रा लोप जुइगुपाखें बचे याये थुगुसी नं थम्हं म्ये प्वाः खनागु खः’, वय्कलं धयादिल ।
थ्व स्वयां न्ह्यः २०६१ सालनिसें २०६४ सालतक थःगु म्ये प्वाःखनादीम्ह वय्कलं थः मां मदुगुलिं बोडेया हे जुजुभाइ बास श्रेष्ठं २०६५ निसें २०७२ सालतक म्ये प्वाः खनाः थ्व जात्रायात निरन्तरता बियादिल ।

थगुने हाकनं म्ये प्वाःखनादीम्ह बुद्धकृणं थुगुसी नापं यानाः न्हय्क्वःखुसी म्ये प्वाःखनादीगु खः । वय्कलं धयादिल, ‘थीथी ल्वचं कःगुलिं चिकित्सकं म्वाइ मखुत धाःगु खः, व हे दँय् जिं थःगु म्ये प्वाः खना, ल्वय् नं लन । वयां लिपा रोजगारीया निंतिं दक्षिण कोरिया वना, अनं लिहां वयेधुंकाः थिमिया कोरिया–नेपाल मैत्री अस्पतालय् निरन्तर एम्बुलेन्स चले यानाच्वनागु दु, छेँजःया अवस्था नं बांलाना वल, आः भगवानप्रतिया व हे विश्वास व आस्थां परम्परा ल्यंकेत हाकनं म्ये प्वाः खनेगु जात्रायात ल्यंका तयेत म्ये प्वाः खनागु खः ।’

वि.सं. २०६० तक वय्कःया हे दाजु कृष्णचन्द्रं नं झिंनिदँ तक निरन्तर रुपं म्ये प्वाःखनाः जात्रायात निरन्तरता बिउगु खः । किंवदन्तीकथं प्राचीनकालय् बोडेया नीलबाराहीया जःखः च्वनीपिं भूतप्रेत, पिशाच, ख्याः, कवंचातय्सं मनूतय्त तसकं दुःख बीगु याना हयेवं तान्त्रिक भीमदत्त कर्माचार्यं तान्त्रिक विद्यां बोडेन्यंकं जाः प्यनाबिल ।

बोडेय् दुःख बीत वःम्ह ख्याः तान्त्रिक कर्माचार्यया जालय् तक्यन । कर्माचार्यं ताःहाकःगु सँ व म्ये ग्यानापुसे च्वंम्ह पिशाच नीलबाराहीया जवय् च्वंम्ह पाले जूगु सीवं वयागु सँ चाना बिल, लं त्वकाबिल अले ताःहाकःगु मुलुं जबरजस्तीं म्येय् दुछ्वयाइ बिसिउँ वने मफयेमा धकाः तुतिइ घंघलां चिनाबिल ।

कर्माचार्यं पिशाचया म्ये प्वाःखनाः च्यानाच्वंगु महाद्वीप व सिँयागु झयतुसे च्वंगु कु कुबिकाः बोडे चाःहिकल । कष्ट सह याये मफयाः पिशाचं थःत त्वःता बिल धाःसा न्ह्यथें ज्याःगु नं बचं पूवंकेगु धायेवं कर्माचार्यं आवंलि बोडे देशय् दुःख मबीगु, ल्वय्, अनिकाल, अनावृष्टि, अतिवृष्टि, तःभुुखाय् थेंज्याःगु प्रकोप जुइके मबीगु, धर्मया चेष्टा अप्वयेकेगु व बोडेवासी धाःथें न्हय्दँ तक उकुन्हु हे म्ये प्वाः खनेत वयेगु बचं ल्हाकाः त्वःता बिउगु किंवदन्ती दु ।

छन्हु चान्हय् म्हगय् नीलबाराहीं थःगु द्वारपालयात अपमानित याःगुलिं कर्माचार्ययात बाँकी तयेमखु धकाः आक्रोश प्वंकेवं पश्ताय् चायाः कर्माचार्यं म्ये प्वाः खने न्ह्यः क्षमा पुजा यायेमाःगु चलन न्ह्याकल, गुगु आतक नं कायम हे दु । बचंकथं न्हय्क्वःतक पिशाचं म्ये प्वाःखन । वयां लिपा व मवइगु जुइवं कर्माचार्यं वहे कथं बोडेवासीपाखें म्ये प्वाःखंकूगु किंवदन्ती दुगु स्थानीयवासीया धापू दु ।

सम्बन्धित बुखँ

LEAVE YOUR COMMENTS