ज्यापु महागुथिइ सत्यनारायण डंगोल नायः

येँ (नेपालभाषा टाइम्स)- ज्यापु महागुथि नेपाःया अध्यक्षय् सत्यनारायण डंगोल निर्वाचित जूगु दु । महागुथिया प्यक्वःगु एकीकृत महाधिवेशनं डंगोलया नेतृत्वय् नीन्हय्म्ह दुजः दुगु ज्यासना पुचः सर्वसम्मत ल्यःगु खः । तःमुँज्याय् किपूया बुद्धिलाल ज्यापुं नं उम्मेदवारी बियादीगु खःसां लिपा ज्यापुं सहमतिया लागिं नां लित कायेवं डंगोल सर्वसम्मत जुयादीगु खः ।

आइतवाः लय्ताः भ्वँय्छेँय् जूगु बन्द सत्रं महागुथिया विधान कथं नायः छम्ह व नीखुम्ह दुजः ल्यःगु खः । न्हूगु ज्यासना पुचलय् रमेश मुनिकार, देवनारायण डंगोल, मचाराजा महर्जन, भक्तिनारायण महर्जन, केशव महर्जन, जुजुभाई डंगोल, मिलनमान महर्जन, कुलबहादुर महर्जन, श्यामकृष्ण संगत, भीमनारायण प्रजापति, श्रीकृष्ण महर्जन, रामेश्वर महर्जन, कृष्णकुमार महर्जन, सानु महर्जन, सुरेन्द्र महर्जन, जयकृष्ण दुवाल, स्वयम्भूराज डंगोल, ज्ञानेन्द्र महर्जन, सान्देवी महर्जन, सरिता महर्जन, सरिता महर्जन, सविना महर्जन, शान्ता प्रजापति, हेराशोभा महर्जन, लक्ष्मी महर्जनपिंत दुजलय् ल्यःगु खः ।

आः ज्यासना पुचःया न्हूपिं दुजःतय् बैठकं न्वकु, महासचिव, सचिव, दांभरि लगायतया पदाधिकारीपिं ल्यइगु जुइ । न्हूपिं दुजःपिनि शपथ ग्रहण मंगलवाः जुइगु खँ धाःगु दु ।वंगु शनिवाः तिंख्यलय् छगू तःजिगु समारोह दथुइ उपप्रधानमन्त्री व गृहमन्त्री नारायणकाजी श्रेष्ठं महाधिवेशनया उलेज्या यानादीगु खः ।