ने. सं. ११४३ चौलाथ्व पारू -

‘नेवाः सीपयात पुस्तान्तरण यायेमाःगु दु’

येँ (नेपालभाषा टाइम्स)- स्वनिगलय् नेवाःतय्सं हना वयाच्वंगु सांस्कृतिक पर्वयात अर्थतन्त्रलिसे स्वायेमाःगु खँ येँ ७ नम्बर क्षेत्रया प्रतिनिधिसभा उम्मेदवार मानुषी यमि भट्टराईं धयादीगु दु । म्हिगः येँय् याःगु पत्रकारत अन्तक्र्रिया ज्याझ्वलय् न्ववायेगु झ्वलय् वय्कलं उगु खँ धयादीगु खः ।

स्वनिगःया सांस्कृतिक वैभव बुलुहुँ न्हना वनाच्वंगु धासें उकियात ल्यंकेगु नितिं नं राज्यं हे भूमिका म्हितेमाःगु खँ नं वय्कलं धयादीगु दु । वय्कलं धयादिल, ‘नेवाःतय्के दुगु सांस्कृतिक सीप थौं वयाः न्हना वनेत्यंगु दु । थुकिया संरक्षण छगू पुस्तां मेगु पुस्तायात स्यनेगु ज्यायात धिसिलाक्क न्ह्याकेगु दायित्व राज्यया खः । यदि झीसं व्यक्तिगत रुपं जक सीप पुस्तान्तरण यायेगु खःसा थ्व सम्भव मदु ।’

उकथं हे वय्कलं नेवाः देय् दबू स्वनिगः विशेष कमिटी व बागमति कमिटीं न्ह्यब्वःगु थीथी प्रस्तावय् थः सकारात्मक जूगु धासें थः निर्वाचित जुयाः वन धाःसा देय् दबुलिं न्ह्यब्वःगु मागयात सम्बोधन याकेगु कुतः यायेगु खँ नं धयादीगु दु ।

उगु हे ज्याझ्वलय् न्ववायेगु झ्वलय् बागमति प्रदेशया खानेपानी, सिंचाई व ऊर्जा मन्त्री लिसें प्रदेशसभा उम्मेदवार बसन्त मानन्धरं नेपालभाषाया पत्रिका म्वाकेगु नितिं थम्हं लोककल्याणकारी विज्ञापनया नितिं कुतः यानागु खःसां नं प्रदेशय् सरकारी कर्मचारीया कारणं सफल जुइ मफुगु खँ धयादीगु दु । पत्रकारतय्सं न्यंगु न्ह्यसःया लिसः बीगु झ्वलय् वय्कलं आः नं लोक कल्याणकारी विज्ञापनया नितिं स्वनिगःया थीथी भाय्या पत्रकारपिंसं आन्दोलन यानाः प्रदेश सरकारयात दवाव बीमाःगु आवश्यकता दुगु खँ धयादीगु दु ।