आकाझाकां ७३ मेगावाट मत बन्द

येँ – प्राविधिक समस्यां यानाः ७३ मेगावाट मत उत्पादन बन्द जूगु दु । नेपाल विद्युत प्राधिकरणया कथं चिलिमे, मैलुङखोला व कुलेखानीया १ व २ आयोजनाया निगू विद्युत गृहपाखें मत उत्पादन बन्द जूगु खः । चिलिमे–त्रिशुली ६६ केभी प्रसारण लाइन वंगु आइतवाः न्हिनय् पौने २ बजे तार चबुनाः चिलिमेया २२ व मैलुङखोलाया ५ यानाः २७ मेगावाट मत प्रवाह बन्द जूगु खः ।

अथेहे कुलेखानी दोसो जलाशय युक्त विद्युतगृहया निगूगु युनिटया जेनटरया आर फेजय् इन्सुलेसन रेजिस्ट्यान्स तसकं म्हो जुयाः रोटरय् समस्या वःगुलिं दयेकेमाःगु अवस्था जूगुलिं बन्द जूगु खँ प्रवक्ता प्रवल अधिकारीं कनादीगु दु । कुलेखानी निगूगु १६ मेगावाट व कास्केट विद्युतगृह जूगुलिं कुलेखानीया न्हापांगु युनिट ३० मेगावाट नापं यानाः ४६ मेगावाट मत उत्पादन जुइ मफइगु अवस्था ब्वलंगु दु ।

वय्कलं कुलेखानीया समस्या ज्यंकेगु निंतिं वंगु प्राविधिक पुचःयात स्थानीय मनूतय्सं मर्मत यायेगु ज्याय् पंगः थंगु खँ कनादीगु दु । ७३ मेगावाट मत प्रणालीं पिने लाःगुलिं यानाः थीथी थासय् म्हिगः मत सिनाच्वंगु खः ।