एमालेया नेतृत्व हिलेमाःगु पक्षय् ८७.६ प्रतिशत मत
येँ (नेपालभाषा टाइम्स) – एमालेलिसे सतिपिं ल्याय्म्हतय्सं पार्टी रुपान्तरण व पुनःसंरचनाया निंतिं न्ह्याकाच्वंगु ‘पुनर्जागरण अभियान-२०८२’ अन्तर्गत याःगु मत सर्वेक्षणया लिच्वः सार्वजनिक याःगु दु । असार १२ गते निसें न्ह्याःगु अभियान अन्तर्गत जूगु सर्वेक्षण असार २२ गते तक न्ह्याःगु खः । मत सर्वेक्षणया निंतिं गुगल फर्मपाखें थीथी झिंच्यागू न्ह्यसः न्यंगु खः ।
उगु फर्मपाखें स्वदेश व विदेशय् च्वंपिं एमालेया संगठित दुजः, समर्थक, शुभेच्छुक लिसें स्वतन्त्र नागरिकतय्सं सुझाव बिउगु दु । नेपाः लिसे मेगु झिंप्यंगू देशय् च्वनाच्वंपिंं नेपाःमितय्सं उगु अभियानय् ब्वति काःगु खँ अभियानकर्ता गजेन्द्र थपलियां कनादीगु दु । वय्कःया कथं मत सर्वेक्षण रिपोर्ट म्हिगः एमालेया महासचिव व एमाले पुनर्गठन कार्यदलया सदस्यसचिव शंकर पोखरेलयात लःल्हाःगु दु ।
अभियानया मू उद्देश्य पार्टीया भावी दिशा, नेतृत्व हस्तान्तरण, संगठनात्मक पुनःसंरचना, पुस्तान्तरण व आन्तरिक लोकतान्त्रीकरण विषयस कार्यकर्ता व शुभेच्छुकया प्रत्यक्ष धापू मुनेगु ज्या याःगु खः । मत सर्वेक्षण प्रक्रियाय् दकलय् अप्वः ४० निसें ६० दँया ४३ दशमलव ७ प्रतिशत मनूतय्सं ब्वति काःगु खः । उकथं हे ६० दं च्वय्या ३७ दशमलव १ प्रतिशत व १८ दँ निसें ३० दँया १३ दशमलव ७ प्रतिशतं ब्वति काःगु खँ सार्वजनिक लिच्वलय् न्ह्यथनातःगु दु ।
मत सर्वेक्षणय् ‘नेकपा एमाले आःया हे अवस्थाय् न्ह्याः वनी ला ?’ धकाः न्यंगु न्ह्यसलय् रुपान्तरणया पक्षय् ९१ प्रतिशतं मत बिउगु दु । उकथं हे विद्यमान पार्टी नेतृत्वया व्यवहार व आचरण सुधार यायेमाः धकाः मत बिउपिनिगु ल्याः ९५ दशमलव ४ प्रतिशत दु । पार्टीया विद्यमान नेतृत्वया कार्यशैली सुधार यायेमाः धकाः मत बिउपिं ९४.९ प्रतिशत दु । पार्टीया नेतृत्व हिलेमाः धइगु पक्षय् ८७.६ प्रतिशत दुसा आःया नेतृत्व हे पाय्छि धाइपिनिगु ल्याः १०.५ प्रतिशत जक दु ।
LEAVE YOUR COMMENTS